„ზეიმობს საქართველო, ზეიმობს ჩვენი სკოლა“- ვალის N4 საჯარო სკოლა ეროვნული ნაკრების გამარჯვებით გამოწვეულ სიხარულს უერთდება
ახალციხის მუნიციპალიტეტის ქალაქ ვალის N4 საჯარო სკოლაში საქართველოს ეროვნული საფეხბურთო ნაკრების ისტორიული გამარჯვება აღნიშნეს.
როგორც სკოლაში გვიყვებიან, 27 მარტის მზიანი დილა განსხვავებულად ლამაზად დაიწყო - ირგვლივ საქართველოს ჰიმნი და გამარჯვების ჰანგები ისმოდა. მოსწავლეები და მასწავლებლები ერთმანეთს ულოცავდნენ. მათი თვალები კი სიხარულისა და ბედნიერების ცრემლებით აივსო.
სკოლაში ამ სიხარულს შემდეგი სლოგანით შეუერთდნენ - „ზეიმობს საქართველო, ზეიმობს ჩვენი სკოლა“.
„ვულოცავთ საქართველოს ნაკრებს და სრულიად საქართველოს ამ დიდ წარმატებას და ვისურვებთ, რომ გამარჯვების სიხარული კიდევ ბევრჯერ განვიცადოთ“,- ამბობენ სკოლაში.
აღსანიშნავია, რომ საქართველოს ნაკრები ისტორიაში პირველად ევროპის ჩემპიონატზეა. საქართველოს ფეხბურთელთა ნაკრებმა ევროპის ჩემპიონატის შესარჩევი ეტაპის საპლეიოფო ფინალში საბერძნეთს უმასპინძლა. მატჩს უდიდესი ღირებულება ჰქონდა – გამარჯვებული ევრო 2024-ზე ითამაშებდა. დაძაბული თამაში პენალტების სერიით დასრულდა, გამარჯვება კი საქართველოს დარჩა.
იხილეთ ფოტოები: