უჯარმის საჯარო სკოლაში სასწავლო პროექტი „ფიზიკა - საინტერესო და სახალისო“ გაიმართა
31-12-2018
უჯარმის საჯარო სკოლის მოსწავლეებს საინტერესო მოვლენა ელოდათ: გაკვეთილების შემდეგ საბუნებისმეტყველო საგნებით დაინტერესებული მოსწავლეები თავიანთ ნამუშევრებს წარმოადგენდნენ.
ეს პროექტი ერთი თვის წინ ფიზიკის უფროს მასწავლებელ ც. მექოშვილთან ერთად მეათეკლასელებმა დაგეგმეს და სხვა კლასების მოსწავლეებიც ჩართეს.
X კლასის მოსწავლეებმა წარმოადგინეს ინტერაქტიული პრეზენტაციები თანამედროვე ფიზიკის საკითხებზე: „ატომური ერა“, „ფიზიკა ფაქტებში - საინტერესოც და სახალისოც“, „კოსმოსი ჩვენ ირგვლივ“ და „მსოფლიო მიზიდულობა“.
გარდა ამ პრეზენტაციებისა, მომზადდა შეკითხვების სლაიდშოუ ორ ჯგუფად გაყოფილი მოსწავლეებისათვის (VIII-IX კლასები) და ჩატარდა კონკურსიც, ხოლო ლევან კიბაბიძემ წარმოადგინა მის მიერ დამზადებული ხელსაწყო - „ვენტილიატორი“.
აღსანიშნავია, რომ ამ ღონისძიებაზე შეირჩა 3 ნამუშევარი და X კლასის მოსწავლეები თამაზ რევაზიშვილი, ლევან კიბაბიძე და მარიამ ილურიძე დარეგისტრირდნენ „მომავალ ფიზიკოსთა ფესტივალზე“ მონაწილეობის მისაღებად, რომელსაც ატარებს თეორიული ფიზიკის ინსტიტუტი (ილიას სახელმწიფო უნივერსიტეტი ) და ფიზიკის მოყვარულთა კლუბი.
სკოლის წარმომადგენლის ცნობით, ეს აქტივობა კიდევ ერთი ნაბიჯი იყო მოსწავლეთა მხრიდან საბუნებისმეტყველო საგნებში ცნობიერების ამაღლებასა და მათი შესწავლისადმი მოტივაციის გაძლიერებაში.