მაღლაკის საჯარო სკოლის სასკოლო საზოგადოება შედგება 56 მოსწავლისგან, 17 მასწავლებლისგან (15 უფროსი მასწავლებელი, 2 უსტატუსო)  მშობლებისაგან და სასოფლო თემისაგან. სკოლაში არის ცხრა ფინანსური კლასი. ბოლო წლების განმავლობაში შეინიშნება მოსწავლეთა კონტინგენტის ზრდა.

სკოლა მდებარეობს ქუთაისთან ახლოს, ამიტომაც მოსწავლეთა ნაწილი ქალაქის სკოლებს მიაშურებენ, რის გამოც მაღლაკის სკოლას მათთან კონკურენცია უძნელდება, სწორედ ამის შედეგია, რომ სკოლა მცირეკონტინგენტიანია.

პედაგოგიური კოლექტივი ორიენტირებულია მოსწავლეთა ინტერესებზე, საჭიროებებსა და მოთხოვნილებებზე. სკოლის სტრატეგიული გეგმით გათვალისწინებულია სკოლის მატერიალური ბაზის შენარჩუნება და განვითარება, უსაფრთხო გარემოს შექმნა, სკოლის პრესტიჟის ამაღლება და მასწავლებელთა სისტემატური პროფესიული განვითარება.

გთავაზობთ მაღლაკის საჯარო სკოლის მოსწავლეთა აქტივობების მცირე ჩამონათვალს:

1. ნიკო კეცხოველის პრემია - 2021-2022 ნახევარფინალი, ქალაქ ქუთაისში ჩატარდა შემაჯამებელი კონფერენცია, სადაც VII-IX კლასის მოსწავლეები პრეზენტაციით წარდგნენ, ბიოლოგიის მასწავლებელი ნათია ფხაკაძე.

მაღლაკის საჯარო სკოლა აღმოცენებულია ზედა მაღლაკის ორკლასიანი სასწავლებლის ბაზაზე, რომელიც შექმნილა 1902 წელს, მაღლაკის მკვიდრის, ექიმი კოტე (კონსტანტინე) თომას ძე ტყეშელაშვილის მიერ. კოტეს თაოსნობით ჩატარებულა სოფლის კრება, სადაც მიუღიათ გადაწყვეტილება, რომ მოსახლეობაში აკრებილიყო სკოლის შენობის შესაძენად და სხვა ხარჯებისათვის საჭირო თანხა, მაგრამ გლეხობის სიღარიბის გამო თანხის შეკრება ვერ მოხერხდა. ამიტომ კოტეს უთხოვია თავისი მამისათვის, თომა ტყეშელაშვილისათვის, რომელიც შეძლებული გლეხი იყო, თავისი თანხით ეყიდა ხის შენობა.

თომას მართლაც შეუძენია ორთვალიანი ხის შენობა თავისი ინვენტარით, დაუდგამს მაცხოვრის ამაღლების ეკლესიის გვერდით მდებარე მიწის ნაკვეთში, რომელშიც დაუარსებია ზედა მაღლაკის მცხოვრებთათვის ორკლასიანი სამონასტრო სასწავლებელი. 1904 წლიდან სამონასტრო სასწავლებელს დაუწყია ფუნქციონირება. სასწავლებელში გლეხის შვილებთან ერთად სწავლობდნენ თავადაზნაურთა შვილები. გლეხები წელიწადში იხდიდნენ 1 მანეთს, თავადაზნაურთა შვილები - 2 მანეთს. სასწავლებელს ხელმძღვანელობდა სასწავლებლის ზედამხედველი- „смотритель училища“.

სასწავლებელთან არსებობდა ე.წ. „მზრუნველთა საბჭო“, 5 წევრის შემადგენლობით, რომელსაც ირჩევდნენ გლეხობიდან. პირველ მზრუნველთა საბჭოში არჩეული ყოფილან: ტყეშელაშვილი სპირიდონი, ფესტვენიძე ექვთიმე, ჩეჩელაშვილი კირილე, ჩეჩელაშვილი ათანასე, ჭოლაძე ლუკა.

სამონასტრო სკოლამ იარსება 1921 წლამდე. საბჭოთა ხელისუფლების დამყარების შემდეგ სასწავლებელი გადაკეთებულა შრომის სკოლად, დაწყებითი კლასებით. 1941 წელს გადაკეთებულა არასრულ საშუალო სკოლად. 1944 წლიდან - 8 წლიან სკოლად. სკოლის პირველი დირექტორი იყო ნიკიფორე გაიოზის ძე ნიჟარაძე. თავიდან სკოლაში ასწავლიდა მხოლოდ ერთი მასწავლებელი, იგივე ზედამხედველი, 4 განყოფილების შექმნამდე და მხოლოდ შემდეგ გაზრდილა მასწავლებელთა შტატი.