„გავუფრთხილდეთ დედამიწას“ - საქობოს საჯარო სკოლის მოსწავლეთა გზავნილი და გარემოს დაცვის მხარდასაჭერი აქტივობები
15-05-2024
სიღნაღის მუნიციპალიტეტის სოფელ საქობოს საჯარო სკოლაში მოსწავლეთა გარემოსდაცვითი ცნობიერების ამაღლებას მნიშვნელოვანი ყურადღება ექცევა.
ამის დასტურია ისიც, რომ სკოლაში დედამიწის დღე საინტერესოდ აღინიშნა. ამ დღესთან დაკავშირებით, სკოლაში მე-4 ა კლასის მოსწავლეებმა ნახატების გამოფენა დევიზით „გავუფრთხილდეთ დედამიწას“ მოაწყეს.
მე-6 ა კლასის მოსწავლეებმა დაამზადეს კედლის გაზეთები. მათ, ასევე მეორე სასწავლო კორპუსის ეზოში მწვანე ნარგავები დარგეს.
გარემოსდაცვით აქტივობებში ბავშვები დიდი მონდომებით, ინტერესითა და ხალისით ჩაერთნენ.
დედამიწის დღე — ყოველწლიური ღონისძიება, რომელიც 22 აპრილს აღინიშნება. ამ დღეს მსოფლიოს გარშემო იმართება გარემოს დაცვის მხარდასაჭერი ღონისძიებები. ის პირველად აღინიშნა 1970 წელს, დღესდღეობით კი დედამიწის დღე ყოველწლიურად აღინიშნება 193 ქვეყანაზე მეტში.