ხაშურის N7 საჯარო სკოლის პედაგოგები მოსწავლეთა წიგნიერების დონის ამაღლებაზე აქტიურად ზრუნავენ და მოსწავლეებს წიგნის კითხვის კულტურას დაწყებით კლასებიდანვე ასწავლიან.
როგორც სკოლაში აღნიშნავენ, ბავშვებისთვის წიგნის კითხვის ჩვევის ჩამოყალიბების პროცესში მშობლების მონაწილეობას განსაკუთრებული როლი ენიჭება. შესაბამისად, წიგნის საჯაროდ კითხვის მსოფლიო დღის აღსანიშნავ საგანმანათლებლო ღონისძიებებში წელს პედაგოგებმა მშობლებიც ჩართეს.
სკოლა გვიზიარებს ხაშურის VII სკოლის დაწყებითი კლასების პედაგოგის - ლია მეტივიშვილის ჩატარებულ სახალისო გაკვეთილს, რომელშიც ბავშვები ოჯახის წევრებთან ერთად მონაწილეობენ.
სპეციალურად ამ დღისთვის პედაგოგმა ლიტერატურული ჟანრის ფაზლი შექმნა, რომელიც მოსწავლეებმა ოჯახის წევრებთან ერთად ააწყვეს და წიგნის კითხვის აუცილებლობაზე კიდევ ერთხელ ისაუბრეს.
წიგნის საჯაროდ კითხვის მსოფლიო დღე საქართველოს წიგნის გამომცემელთა და გამავრცელებელთა ასოციაციის ინიციატივით, საქართველოში უკვე მეცხრედ აღინიშნა. წელს ღონისძიებას ასოციაცია „მშობლები განათლებისთვის“ შეუერთდა.
პედაგოგებისა და მშობლების მონაწილეობით პროექტში უკვე 200-ზე მეტი სკოლა ჩაერთო.
იხილეთ ფოტო:
