ოზურგეთის N1 საჯარო სკოლაში დირექტორ მაია თავართქილაძის ხელმძღვანელობით, მოსწავლეთა გარემოსდაცვითი ცნობიერების ამაღლებას მნიშვნელოვანი ყურადღება ექცევა.
2 თებერვალს ჭარბტენიანი ტერიტორიების საერთაშორისო დღე აღინიშნება.
ამ დღესთან დაკავშირებით, პირველი საჯარო სკოლის ეკოკლუბმა Nature Club-მა შეხვედრა ჩაატარა.
მოსწავლეებმა შეხვედრაზე პასუხი გასცეს კითხვას - რატომ გვჭირდება ჭარბტენიანი ტერიტორიები?
„დღეს მსოფლიოში წყლის კრიზისი რეალური და მზარდი საფრთხეა. ადამიანები იმაზე მეტი რაოდენობის წყალს მოვიხმართ, ვიდრე ბუნებას შეუძლია აღიდგინოს. კრიტიკულად ზიანდება და ნადგურდება ჭარბტენიანი ტერიტორიები – ეკოსისტემა, რომელზეც სასმელი წყალი და სიცოცხლე ყველაზე მეტადაა დამოკიდებული.
მტკნარი და მლაშე წყალჭარბი ტერიტორიები ბუნებისა და ადამიანის სიცოცხლისთვის აუცილებელია. ისინი უზრუნველყოფენ ჩვენს სოციალურ და ეკონომიკურ განვითარებას სხვადასხვა გზით:
ინახავენ წყლის მარაგს და ასუფთავებენ მას;
ჭარბტენიანი ტერიტორიები მტკნარი წყლის უდიდეს ნაწილს ინახავენ.
ბუნებრივად ფილტრავენ მას სხვადასხვა დამაბინძურებლისგან და სასმელად ვარგისს ხდიან.
წყალჭარბი ტერიტორიები წყალდიდობებისა და შტორმებისაგან გვიცავენ.
არეგულირებენ კლიმატს: ტორფიანი ჭაობები ტყეებზე ორჯერ მეტ ნახშირბადს ინახავენ. ნახშირბადის მნიშვნელოვან ნაწილს ასევე ინახავენ წყლის მცენარეები, მანგროვული ტყე და მლაშე ჭაობები.
დღეს წყლის რესურსი ამოწურვადია, მისი ხარჯვა კი – არამდგრადი“,- აღნიშნეს მოსწავლეებმა, ბუნებრივი რესურსების დაცვის მნიშვნელობას გაუსვეს ხაზი და საზოგადოებას გარემოსდაცვისკენ მოუწოდეს.
იხილეთ ფოტოები:
