ახალქალაქის მუნიციპალიტეტის სოფელ ტურცხის საჯარო სკოლის მოსწავლეებმა ახალი წელი კოთელიის საჯარო სკოლის მოსწავლეებთან ერთად აღნიშნეს.
ღონისძიება დაიგეგმა სოფელ ტურცხისა და კოთელიის საჯარო სკოლის ქართული ენის მასწავლებლის - თამარ დევდარიანის, სოფელ ტურცხის საჯარო სკოლის დაწყებითი კლასების მასწავლებლების - არაქსი ფაშაიანის, აიასტან გუკასიანის, ნარინე არაქელიანისა და სონია აპარიანის, ასევე ქართული ენის კათედრის წევრი მასწავლებლის - ფაუსტინა ალბერტიანის მონაწილეობით.
აქვე უნდა აღინიშნოს, რომ სოფელ კოთელიის საჯარო სკოლის მოსწავლეებს მხარში ედგა და ღონისძიების ორგანიზებაში მონაწილეობდა სოფელ კოთელიის საჯარო სკოლის მუსიკის მასწავლებელი.
როგორც ტურცხის საჯარო სკოლაში გვიყვებიან, ღონისძიება საქართველოს და სომხეთის ჰიმნების შესრულებით დაიწყო და საახალწლო საჩუქრების დარიგებით დასრულდა.
ორი მეგობარი სკოლის პროექტის ფარგლებში მოსწავლეებმა შესანიშნავად წარმოადგინეს ქართული და სომხური ცეკვები, სიმღერები და ლექსები.
„ღონისძიებას, გარდა საზეიმო განწყობის შექმნისა, კიდევ სხვა უფრო სიღრმისეული მიზანი ჰქონდა, რომელიც ქართველი და სომეხი ბავშვების კულტურათა დამეგობრების ერთ-ერთ საუკეთესო მაგალითად შეიძლება ჩაითვალოს“, - გვეუბნება ტურცხის საჯარო სკოლის დირექტორი შორენა აკოფაშვილი.
„სოფელ ტურცხის საჯარო სკოლის დირექცია, მთელი გულით ულოცავს სასკოლო საზოგადოებას ახალ წელს და უსურვებს მშვიდობას, ბედნიერებას, ხვავს, ბარაქას, სიკეთესა და კეთილდღეობას!!
ყოველივე საუკეთესოს მომტანი ყოფილიყოს დამდეგი ახალი წელი ჩვენი ქვეყნისთვის და მთელი კაცობრიობისთვის!! დაესწარით მრავალს!!“- ვკითხულობთ შორენა აკოფაშვილის მისალოც წერილში.
იხილეთ ფოტოები:
