ქობულეთის მუნიციპალიტეტის სოფელ გვარას საჯარო სკოლაში წინასაახალწლო მღელვარება, საზეიმო განწყობა და ჟრიამულია.
„სიზმრად ვნახე გარეთ თოვდა, მაგრამ სულ არ ციოდა“, - დიდი სიამოვნებით, მონდომებითა და ხალისით მღერიან გვარას საჯარო სკოლის პირველკლასელები.
როგორც სკოლაში გვიყვებიან, ბედნიერება მათ სახეზეც აღბეჭდვიათ და ხმაშიც, რადგან დიდი ზეიმის მონაწილენი არიან.
ამ ზეიმის სულისჩამდგმელი კი, დამრიგებელი იანა მეგრელიძე გახლავთ, ხოლო მუსიკალური გაფორმების ავტორი მასწავლებელი ნათია ბაუჟაძეა.
აღსანიშნავია, რომ პატარებმა ახალი წლის მოახლოება ზღაპრის გმირებთან ერთად იზეიმეს. ღონისძიება გაალამაზეს „ფიფქია და შვიდი ჯუჯას“ პერსონაჟებმა, ნაცარქექია და დევიც სტუმრობდნენ სკოლას, მგელი, ვეფხვი, მაიმუნი და ძალიან საყვარელი ყურშაც კი, მონაწილეობდნენ შთამბეჭდავ წარმოდგენაში.
„მადლობა, პატარებო, ამ სიხარულის ჩუქებისთვის. ნათელი მომავალი და წინსვლა მინდა გისურვოთ ჩვენი ლამაზი ქვეყნის სადიდებლად“, - ასე დალოცა პატარები სკოლის სასწავლო ნაწილის გამგე ნანული პაპუნაიშვილმა.
იხილეთ ფოტოები:
