წალენჯიხის მუნიციპალიტეტის საჩინოს თემის N2 საჯარო სკოლის პედაგოგები მოსწავლეებს მეტად საინტერესო სასწავლო პროცესს სთავაზობენ.
3 დეკემბერს, საბუნებისმეტყველო კათედრის მასწავლებლებმა ჩაატარეს არაფორმალური გაკვეთილი ფიზიკის მასწავლებლის მამისა ფიფიას სახლში. გაკვეთილის თემა იყო - ღომის მომზადების ეტაპების დაფიქსირება.
გაკვეთილი მოსწავლეებისთვის სასწავლო-შემეცნებითთან ერთად თავშესაქცევიც აღმოჩნდა. მოსწავლეები მონაწილეობდნენ ყველა აქტივობაში - სიმინდის დაფქვა, გაცრა, გარეცხვა, მოხარშვა, ჩაზელვა, ამოღება და დეგუსტაცია.
გაკვეთილის მიზანი იყო საბუნებისმეტყველო საგნების ინტეგრაცია ყოფა-ცხოვრებაში.
როგორც სკოლაში გვიყვებიან, შემდეგ ეტაპზე, მოსწავლეები პოსტერზე ააწყობენ პროცესის თანმიმდევრობას და გაიაზრებენ, რომელ ეტაპზე რომელი პროცესი (ფიზიკური, ქიმიური, ბიოლოგიური) არის წამყვანი.
„სწავლება კეთებით და არაფორმალური გარემო – ორი საუკეთესო მეგობარია ხარისხიანი განათლებისა“,- გვეუბნებიან სკოლაში და მადლობას უხდიან ფიზიკის მასწავლებელს გულითადი მასპინძლობისთვის.
„მადლობა, მამისა მასწავლებელს მასპინძლობისთვის, მადლობა მშობლებს მხარდაჭერისთვის, მადლობა მოსწავლეებს აქტიურობისთვის!“,- აღნიშნავენ პედაგოგები.
იხილეთ ფოტოები:
