ამჯერად, სკოლაში, კლუბის მორიგი სხდომა ჩატარდა, რომელსაც მისი წევრები: მე-4, მე-5, მე-6, მე-7 კლასების მოსწავლეები, კურატორები: ვალიდა კვირიკაშვილი და დარეჯან ნემსაძე ესწრებოდნენ.
პედაგოგებმა კითხვა-პასუხის რეჟიმში გამოიკითხეს ედით ნესბიტის - „რკინიგზის ბავშვების“ მე-5 თავი „ტუსაღები და ტყვეები“ და მე-6 თავი „მატარებლის გადამრჩენები“.
აღნიშნულ შეხვედრაზე ყურადღება გამახვილდა შემდეგ კითხვებზე:
- ვინ მიიქცია ბრბოსა და ბავშვების ყურადღება სადგურის მოსაცდელ დარბაზში?
- რატომ ვერ გაიგეს უცნაური კაცის საუბარი და რა ინანეს ბავშვებმა ?
- რაში დაარწმუნეს ბავშვებმა სადგურის უფროსი?
- როგორ გაიგეს კაცის ეროვნება?
- რატომ ელოდნენ ბავშვები და სადგურის უფროსი დედის ჩამოსვლას?
- რა გაარკვია დედამ უცხოელის შესახებ მასთან საუბრის დროს?
- როგორ მოუარეს დედამ და ბავშვებმა უცნობს? რით შემოსეს სტუმარი?
- რა ეჭვები გაუჩნდა ბობის ზანდუკში ჩახედვის დროს ?
- ვინ იყო რუსის ჯენტლმენი?
- როგორი წიგნი დაწერა მან და რატომ დაისაჯა სიკეთისათვის ?
- როგორ აღმოჩნდა რუსი მწერალი ინგლისში ?
- რა სთხოვა დედამ ბავშვებს?
მე-5 თავის წაკითხვის შემდეგ კურატორებმა გაამახვილეს ყურადღება უცხო სიტყვების განმარტებაზე: კატორღა და დეზერტირი. როგორც სკოლაში გვიყვებიან, მოსწავლეებმა არ იცოდნენ მათი მნიშვნელობა. თუმცა, ამომწურავი განმარტება მიიღეს პედაგოგებისგან.
წაკითხული თავის მიხედვით ბავშვებმა გამოკვეთეს პერსონაჟთა ხასიათის ისეთი თვისებები როგორიცაა ემპათია, სიკეთის კეთების სურვილი, მზრუნველობა. ხოლო მე-6 თავის გაანალიზების შემდეგ, როგორც გვიყვებიან, გაჩნდა კითხვები:
- როგორ ეხმარებოდა დედა რუსის ჯენტლმენს ოჯახის პოვნაში?
- როგორ ექცეოდნენ ბავშვები სტუმარს?
- რისთვის წავიდნენ პერქსთან?
- რამ გააბრაზა პერქსი?
- რას შეესწრნენ ბავშვები , როდესაც ველური ალუბლისათვის გააგზავნა დედამ?
- რა ხერხს მიმართეს ბავშვებმა მატარებლის გადასარჩენად ?
- როგორ ახასიათებს ეს საქციელი ბავშვებს?
მოსწავლეები გულდასმითა და დიდი ყურადღებით უსმენდნენ ერთმანეთს და საკუთარ მოსაზრებებს თამამად აფიქსირებდნენ.
აღნიშნული თავის წაკითხვისას წინა ადგილებზე წამოიწია პერსონაჟების ისეთი თვისებები, როგორიცაა: გულისხმიერება, გამბედაობა, საზრიანობა, გონებაგამჭრიახობა.
როგორც სკოლაში გვეუბნებიამ მომდევნო მეცადინეობისთვის, რომელიც 2 ნოემბერს ჩატარდება, მოსწავლეებს დაევალათ ნაწარმოების მე-7 და მე-8 თავების „სიმამაცისთვის“, „დამწყები მეხანძრეების“ წაკითხვა და საკვანძო საკითხებზე ყურადღების გამახვილება.
იხილეთ ფოტოები:
