სიღნაღის მუნიციპალიტეტის სოფელ საქობოს საჯარო სკოლაში სასწავლო წელი აქტიურად მიმდინარეობს. სკოლაში სხვადასხვა პროექტი იმართება, რომელთან დაკავშირებით შეხვედრები ეწყობა.
ამჯერად, სამოქალაქო განათლების პროგრამის ფარგლებში, როგორც სკოლაში აღნიშნავენ, ლიდერ სკოლაში, საქობოში, დემოკრატიული მართვის საუკეთესო პრაქტიკების ადგილზე გასაცნობად, პარტნიორი ანაგის, ვაქირის, ტიბაანის და ბოდბისხევის სკოლების, ასევე არაპარტნიორი წნორის N1 და N3 სკოლების წარმომადგენელთა შეხვედრა მოეწყო.
შეხვედრაზე საქობოს საჯარო სკოლის მოსწავლეებმა 2022-2023 სასწავლო წელს განხორციელებული პროექტების პრეზენტაცია წარადგინეს.
„განსაკუთრებით აქცენტი გაკეთდა სკოლის მოსწავლეთა თვითმმართველობის წარმატებულ მუშაობაზე“, - გვიყვებიან სკოლაში.
შეხვედრაზე პარტნიორმა სკოლებმა ერთმანეთს გაუზიარეს მიმდინარე პროექტების აქტივობები, ასევე განიხილეს იდეების მონახაზი, რჩევები, რეკომენდაციები.
ეს დღე საინტერესო და ნაყოფიერი იყო იქ მყოფი თითოეული ადამიანისთვის.
აღსანიშნავია, რომ მოსწავლეები სასწავლო პროცესში აქტიურად არიან ჩართულნი.
იხილეთ ფოტოები:
