ბაღდათის N1 საჯარო სკოლის წარმატებულ და გამორჩეულ პედაგოგებს შორისაა, მუსიკის მასწავლებელი და კომპოზიტორი - ნუკრი კარკაძე, რომელმაც კოლეგებისთვის მასწავლებლის ეროვნული დღე დაუვიწყარ დღესასწაულად აქცია.
პედაგოგმა, 2 არაჩვეულებრივი სიმღერა შექმნა მასწავლებელზე, რომლის პრემიერაც, მასწავლებლების ეროვნული დღისადმი მიძღვნილ ზეიმზე, ბაღდათის ცენტრში შედგა.
როგორც სკოლაში გვიყვებიან, საოცრად შთამბეჭდავი იყო ტაძრის ფონზე თეთრ სამოსში გამოწყობილი გოგო-ბიჭები. ბაღდათის N1 საჯარო სკოლის მოსწავლეებმა შეასრულეს სიმღერა - „ჩემო პირველო მასწავლებელო“, როკითის საჯარო სკოლის მოსწავლეებმა კი - სიმღერა „მასწავლებელი სხვა სიმაღლეა“.
ბავშვებმა სიმღერის ბოლოს ციმციმა, მანათობელი ბუშტები აუშვეს ცაში და გაატანეს თავიანთი სურვილები.
აღსანიშნავია, რომ ღონისძიება დირექტორმა - მერაბ ფურცელაძემ გახსნა. მან სამადლობელი სიგელები გადასცა წარმატებულ მასწავლებლებს: ნუკრი კარკაძეს, ეროვნულ და საერთაშორისო კონკურსებსა და ფესტივალებში წარმატებით მონაწილეობისათვის და ნინო ზირაქაძეს ეროვნულ და საერთაშორისო დონეზე ჩატარებულ კონფერენციებსა და კონკურსებში მიღწეული წარმატებისთვის.
ღონისძიება მისალოცი სიტყვით დაასრულა საგანმანათლებლო რესურსცენტრის ხელმძღვანელმა - ნინო მშვილდაძემ.
„განსაკუთრებული საღამო ჰქონდა ბაღდათს!“ - ასე აფასებენ სკოლაში, მასწავლებლის დღისადმი მიძღვნილ საზეიმო ღონისძიებას და დაუვიწყარ დღესასწაულს.
იხილეთ ფოტოები:
