მარლენ ბარამიას სახელობის სამტრედიის N6 საჯარო სკოლას არაერთი წარმატებული და საამაყო კურსდამთავრებული ჰყავს, მათ შორის არის გიორგი სტურუა, რომელიც დიპლომირებული მედიკოსის სპეციალობის შესწავლას შეუდგა.
გიორგი პროფესიას აკაკი წერეთლის სახელმწიფო უნივერსიტეტში ეუფლება.
ახალგაზრდამ, რომელმაც სახელმწიფოსგან 100%-იანი დაფინანსება მოიპოვა, თვლის, რომ ექიმობა მისი რეალიზებული ოცნება იქნება.
სკოლაში დიდი სიამაყით გვიყვებიან, რომ ვინც გიორგის იცნობს, ყველას სჯერა, რომ ბიჭი, რომელსაც უკვე წლებია სამტრედიაში „ბიჭი–ორკესტრის“ სახელით იცნობენ, ხალხს თეთრი ხალათითაც დაამახსოვრებს თავს.
გიორგისთვის ყველაზე დიდი მხარდამჭერი ოჯახი და დედაა.
„ჩემს ზურგს უკან ოჯახი და დედა დგას, რომელთაც უდიდესი წვლილი მიუძღვით ჩემს გადაწყვეტილებაში. ამაყი ვარ და მათი თანადგომა მაძლიერებს“, - აცხადებს მომავალი ექიმი, რომელმაც კარდიოქირურგიაში დახელოვნება სწორედ აკაკი წერეთლის სახელმწიფო უნივერსიტეტიდან დაიწყო.
