წალენჯიხის მუნიციპალიტეტის საჩინოს თემის N1 საჯარო სკოლაში პროექტებით სწავლება აქტიურად და წარმატებით მიმდინარეობს, რაც მოსწავლეთა მრავალმხრივ განვითარებაზე დადებითად აისახება.
ამჯერად, სკოლაში ხორციელდება ისტორიისა და გეოგრაფიის მასწავლებლების - ფიქრია კვირიკაძისა და ირინე აბრალავას მიერ დაგეგმილი გრძელვადიანი პროექტი - „მოიარე საქართველო“, რომელიც გასვლით ღონისძიებებს მოიცავს.
პროექტის ფარგლებში ექსკურსია მოეწყო საჩინო-მარტვილის მიმართულებით.
მოსწავლეები, პედაგოგების ხელმძღვანელობით, ესტუმრნენ მარტვილის მკვიდრს, მევენახე ზაზა გაგუას, რომელსაც საკუთარი მარანი და მეურნეობა აქვს სოფელ თარგამულში.
ვიზიტი მოსწავლეებისთვის მეტად შემეცნებითი აღმოჩნდა.
„ფერმერმა გაგვაცნო სამეგრელოში გავრცელებული ვაზის ჯიშები, ღვინის დამზადების ძველი და ახალი ტექნოლოგიები, ისაუბრა სამომავლო გეგმებზე, რითაც ხელს შეუწყობს მეღვინეობის განვითარებას არა მხოლოდ კონკრეტულ რაიონში, არამედ მთლიანად რეგიონში და მთელს ქვეყანაში“,- გვიყვებიან სკოლაში.
ბავშვებმა მონაწილეობა მიიღეს ყურძნის კრეფაში, დაათვალიერეს ღვინის კოლექცია, რომელიც ევროპის 14 ქვეყანაში იყიდება.
„ჩვენი სკოლის და მთელი სამეგრელოს სახელით, მადლობას ვუხდით, ბატონ ზაზას, თავისი კუთხის პატრიოტს, იმ დიდი საქმისთვის, რომელსაც ემსახურება. წარმატებას ვუსურვებთ და ვისურვებთ ბევრ მისნაირს საქართველოში“,- დასძენს სკოლის წარმომადგენელი.
მოსწავლეთა ინტერესის მორიგი ობიექტები იყო მარტვილის კანიონი, სალხინოს დადიანების რეზიდენცია და მარტვილის ტაძარი, რომელსაც სიხარულით ესტუმრნენ.
მოსწავლეები შთაბეჭდილებებით დატვირთული დაბრუნდნენ შინ.
იხილეთ ფოტოები:
