იაგო მიქელაძის სახელობის შუახევის მუნიციპალიტეტის სოფელ ბუთურაულის საჯარო სკოლის მოსწავლეები არაერთ საინტერესო ღონისძიებასა თუ აქტივობაში ერთვებიან.
ამჯერად მათ კიდევ ერთ მნიშვნელოვან წარმატებას მიაღწიეს. მოსწავლეები სმარტ-ფილმების საერთაშორისო ახალგაზრდულ ფესტივალში გამარჯვებისთვის დაჯილდოვდნენ.
როგორც სკოლაში ამბობენ, პირველად მთიანი აჭარის ისტორიაში, შუახევში სმარტ-ფილმების საერთაშორისო ახალგაზრდული ფესტივალი „სინეფოუნ-აჭარა“ ჩატარდა. მსოფლიოს 20 ქვეყნიდან 64 ფილმი გამოიგზავნა, შერჩევის შედეგად კი ფესტივალზე 20 ფილმი წარადგინეს.
ფესტივალის ფარგლებში, ახალგაზრდების გადაღებული მოკლემეტრაჟიანი ფილმების ჩვენება/განხილვა მოეწყო, გარდა ამისა საუბრები კინოხელოვნებაზეც გაიმართა. სხვადასხვა ნომინაციაში გამარჯვებული და გრან- პრის მფლობელი ახალგაზრდები საზეიმოდ დაჯილდოვდნენ.
დაჯილდოებულთა შორის იაგო მიქელაძის სახელობის ბუთურაულის საჯარო სკოლის VIII და IX კლასის მოსწავლეები - ელენე მიქელაძე და ლანა დიასამიძე იყვნენ, რომლებსაც სასაჩუქრე ვაუჩერები, სიგელები და სიმბოლური საჩუქრები გადაეცათ.
სკოლის ადმინისტრაცია მადლობას უხდის მოსწავლეებს ფესტივალში აქტიური მონაწილეობისა და სკოლის წარმოჩენისათვის.
იხილეთ ფოტოები:
