ხობის მუნიციპალიტეტის სოფელ ხამისქურის საჯარო სკოლის დირექტორი და ამავე დროს ინგლისური ენის პედაგოგი მზია ჟვანია პროფესიულ წინსვლასა და განვითარებაზეა ორიენტირებული.
მზია ჟვანიამ წამყვანი მასწავლებლის სტატუსი მოიპოვა. მასწავლებელთა პროფესიული განვითარების ეროვნული ცენტრის სპეციალურმა კომისიამ მისი პედაგოგიური საქმიანობის ნაწილი დადებითად შეაფასა.
სკოლაში დირექტორის წარმატება ახარებთ და მასწავლებლის სტატუსის ამაღლებას ულოცავენ.
აღსანიშნავია, რომ სტატუსის ამაღლების მსურველი მასწავლებლების ნაწილს, ვინც პროფესიული საქაღალდე კომისიას წარუდგინა, eSchool-ის ბაზაში სტატუსი უკვე აესახა.
მასწავლებელთა პროფესიული განვითარებისა და კარიერული წინსვლის სქემის მიხედვით, პედაგოგები კატეგორიებად ნაწილდებიან. მასწავლებელს სქემა საშუალებას აძლევს, კატეგორიაში დაწინაურდეს და შესაბამისად უფრო მეტი ანაზღაურებაც მიიღოს.
