ზუგდიდის მუნიციპალიტეტის სოფელ ჩხორიის საჯარო სკოლის მოსწავლეები სხვადასხვა საგანმანათლებლო და შემეცნებით პროექტში მონდომებით მონაწილეობენ, სადაც წარმატებას აღწევენ.
ერთ-ერთი ასეთი მოსწავლეა მეათეკლასელი დიმიტრი ზაქარაია, რომელიც სასკოლო-საგანმანათლებლო პროექტის - „თვითმმართველი ლიდერები 2023“ დასკვნითი ღონისძიებაზე საქართველოს მასშტაბით სამოცი მოსწავლიდან სამ საუკეთესოს შორის დასახელდა.
სასკოლო-საგანმანათლებლო პროექტის დასკვნითი ღონისძიება 10 ივნისს კავკასიის საერთაშორისო უნივერსიტეტში გაიმართა.
პროექტში საჯარო და კერძო სკოლების მოსწავლეთა თვითმმართველობის ლიდერები და თვითმმართველობის წევრები მონაწილეობდნენ (მე-10-12 კლასები).
პროექტი მიზნად ისახავდა მოსწავლეებში თვითმმართველობის მნიშვნელობის გააააზრებას, ასევე ლიდერობის, გუნდური მუშაობისა და კვლევითი უნარ-ჩვევების განვითარებას.
როგორც სკოლაში გვიყვებიან, პროექტი სამ ეტაპს მოიცავდა:
- კავკასიის საერთაშორისო უნივერსიტეტის პოლიტიკის მეცნიერების დოქტორანტის, პიარფსიქოლოგ მაგდა კოტრიკაძის ორდღიანი ონლაინტრენინგი თემებზე: კომუნიკაცია VS მისკომუნიკაცია, პიარფსიქოლოგია; როგორ შევქმნათ ხარისხიანი მარკეტინგული პროდუქტი;
- გუნდური საშინაო დავალება;
- მენტორების ხელმძღვანელობით - მარკეტინგული კამპანიის დაგეგმვა.
პროექტში საქართველოს მასშტაბით 60 სკოლის ამდენივე მოსწავლე მონაწილეობდა. პროექტის პრეზენტაციები კომისიამ შეაფასა.
„ჩხორიის საჯარო სკოლის დირექცია ულოცავს დიმიტრის მიღწეულ წარმატებებს“, - აღნიშნავენ სკოლაში.
სასკოლო საზოგადოება მოსწავლეთა წარმატებას მუდამ მხარს უჭერს.
იხილეთ ფოტო-ვიდეომასალა:
