თბილისის N49 საჯარო სკოლაში მოსწავლეთა განვითარებასა და ცოდნის გაღრმავებაზე ორეინტირებული არაერთი აქტივობა იმართება.

ამჯერად, სასკოლო პროექტის - „კულტურული მემკვიდრეობა“, ფარგლებში, პედაგოგების - ანა ბედიაშვილის და ლია მანძულაშვილის ხელმძღვანელობით, VI, VII^ა და VII^ბ კლასის მოსწავლეებმა თემაზე - „ჩვენი თვალით დანახული ფიროსმანი“ იმუშავეს. 

პროექტის ფარგლებში, მოსწავლეები დიმიტრი შევარდნაძის სახელობის ეროვნულ გალერეაში ფიროსმანის გამოფენაზე იმყოფებოდნენ.  შემდეგ, მოსწავლეებმა ინფორმაცია ნიკო ფიროსმანაშვილის ბიოგრაფიასა და მასზე დაწერილ ლექსებზე მოისმინეს. მათ კედლის გაზეთები და პრეზენტაციები მოამზადეს. 

გარდა ამისა, VI კლასის მოსწავლეებმა, ფიროსმანის ნახატების შთაგონებით, ნამუშევრები შექმნეს და გამოფენა მოაწყვეს. ასევე, VII^ა და VII^ბ კლასის მოსწავლეებმა ფიროსმანის თემაზე შექმნილი დიორამები და ქანდაკებები გამოფინეს.

შემოქმედებითი ღონისძიების დროს, მოსწავლეებმა კიდევ ერთხელ ისაუბრეს ნიკო ფიროსმანის ცხოვრებასა და შემოქმედებაზე, წაიკითხეს ლექსები. როგორც სკოლაში ამბობენ, მოსწავლეებმა ფიროსმანის უნიკალურობა და თვითმყოფადობა, ასევე, თვითნასწავლი მხატვრის უსაზღვრო სიყვარული სამშობლოსადმი მკაფიოდ შეიგრძნეს. 

აქტივობებმა უდიდესი წარმატებით და ნაყოფიერად ჩაიარა. 

იხილეთ ფოტოები: