ტყიბულის N6 საჯარო სკოლაში მოსწავლეთა ცოდნის გაღრმავებასა და მოტივაციის ამაღლებას მნიშვნელოვანი ყურადღება ექცევა. სწორედ ამიტომ, სასკოლო საზოგადოება სხვადასხვა საინტერესო ადამიანთან შეხვედრებს აწყობს.
ამჯერად, ქართული ენისა და ლიტერატურის კათედრამ პროექტის - „ოკრიბის კულტურული მემკვიდრეობა“ ფარგლებში, ანრო ცირეკიძესთან, ღვაწლმოსილ პედაგოგთან, „ვეფხისტყაოსნის“ ზეპირად მცოდნესთან შეხვედრა მოაწყო.
„ქალბატონი ანრო არის მრავალი კონკურსის გამარჯვებული, ღირსეული ადამიანი, რომელმაც ისტორია შექმნა“, - აღნიშნავს სკოლის წარმომადგენელი.
როგორც სკოლაში გვიყვებიან, სტუმართან ასევე მოეწყო ბლიც-ინტერვიუ, რომელსაც უძღვებოდა პედაგოგ ანრო ცირეკიძის მოსწავლე, ქართული ენისა და ლიტერატურის მასწავლებელი დოდო ქათამაძე.
„საინტერესოდ წარიმართა თამაში - ლოტო „ვეფხისტყაოსანი“, რომელშიც გამარჯვება წილად ხვდა ქალბატონ ანრო ცირეკიძეს. ეს დღე არასოდეს დაავიწყდებათ X ბ კლასის მოსწავლეებს, რომელთა დამრიგებელი მაია აბესაძე გახლავთ. ეს იყო „ვეფხისტყაოსნის“ ზეიმის დღე, გულახდილობისა და სიყვარულის, ერთმანეთისადმი სითბოს გამოხატულების დღე“, - გვიყვებიან სკოლაში.
აღსანიშნავია, რომ მსგავსი შეხვედრები და აქტივობები მოსწავლეთა მოტივაციის ამაღლებას ხელს უწყობს.
იხილეთ ფოტოები:
