საქართველოს საპატრიარქოს წმინდა ნინოს სახელობის მართლმადიდებლურ სკოლას მრავალი ნიჭიერი და გამორჩეული მოსწავლე ჰყავს. ისინი ხშირად მონაწილეობენ საქალაქო კონკურსებში და არაერთხელ მოუპოვებიათ გამარჯვება.

განსაკუთრებით აღსანიშნავია, რომ მათ განვითარებაზე, მოტივირებასა და ცოდნის გაღრმავებაზე პროფესიონალი პედაგოგები ყოველდღიურად ზრუნავენ. ისინი ამ მიზნით, სწავლებისას თანამედროვე მეთოდებსა და აქტივობებს იყენებენ. 

ერთ-ერთი ნიჭიერი მოსწავლე თეკლა კვანჭიანია. როგორც სკოლაში ამბობენ, გოგონაში ჰარმონიულადაა შერწყმული მთიელის მტკიცე ბუნება და საოცარი სინატიფე. ის დიდი მონდომებით და სერიოზულობით ეკიდება სასწავლო პროცესს. ამჯერად, თეკლა კვანჭიანი მათემატიკის კონკურსზე, ღირსეულ და უნიჭიერეს პრეტენდენტებთან ერთად, ნახევარფინალში გადავიდა და 100 მოსწავლიდან რჩეულ ოცეულში მოხვდა. 

თეკლას პედაგოგები - ლალი მელივა, ირმა წითაძე და ეკა ლომინაძე დიდი სიამაყით აღნიშნავენ გოგონას წარმატებას და უსურვებენ მრავალი მწვერვალის დაპყრობას.