ჩოხატაურის მუნიციპალიტეტის სოფელ ერკეთის საჯარო სკოლაში, 9 აპრილს მუსიკალურ- ლიტერატურული კომპოზიცია - „კალთასისხლიანი აპრილი“, მიეძღვნა.
პედაგოგებმა და მოსწავლეებმა 1989 წლის აპრილში, ქვეყანაში მიმდინარე მოვლენებზე ისაუბრეს, გმირებს სანთლები აუნთეს და წუთიერი დუმილით, 9 აპრილს დაღუპული 21 ქართველის ხსოვნას პატივი მიაგეს.
მოსწავლეებმა, გმირობაზე, სამშობლოსათვის თავდადებასა და 9 აპრილის ტრაგედიაზე დაწერილი ლექსები მხატვრულად წაიკითხეს, რომლებსაც ამავე თემაზე შექმნილი მუსიკალური ნაწარმოები ენაცვლებოდა.
ღონისძიება დაიწყო და დამთავრდა სიმღერით - „ვაჩუქოთ ერთმანეთს ტიტები“.
„იყო სევდა, განცდები და უდიდესი სიამაყე, რომ სამშობლოს თავისუფლებისა და დამოუკიდებლობისათვის ბრძოლა ადამიანებს გმირებად აქცევს, გმირები კი არასოდეს არ ბერდებიან და არ კვდებიან“, - აღნიშნავენ სკოლაში.
ცნობისთვის, 1989 წლის 9 აპრილს, თბილისში ტრაგედია დატრიალდა, რაც გამოიხატა საბჭოთა არმიის მიერ საქართველოს დამოუკიდებლობის მოთხოვნით მოწყობილი მშვიდობიანი დემონსტრაციის ძალისმიერ დარბევაში. შედეგად 21 ადამიანი დაიღუპა და 427 კი, დაშავდა. 9 აპრილი კი საქართველოს დამოუკიდებლობის მოპოვებისთვის გარდამტეხი თარიღი გახდა.
იხილეთ ფოტოები:
