დავით კაკიაშვილის სახელობის ხაშურის N2 საჯარო სკოლის მასწავლებლები პროფესიულ განვითარებაზე აქტიურად ზრუნავენ და ამ მიზნით სხვადასხვა საგანმანათლებლო ღონისძიებებში მონაწილეობენ.
ამჯერად, ინგლისური ენის მასწავლებელი ქეთევან გოგალაძე, გაცვლითი პროგრამის - Access Exchange 2023-ის მონაწილე გახდა და ამერიკის შეერთებულ შტატებში გაემგზავრა.
როგორც სკოლაში გვიყვებიან, ქეთევანი, პროგრამის ფარგლებში, 3 მარტიდან 27 მარტის ჩათვლით დაესწრება ორკვირიან პროფესიული განვითარების კურსს ვაშინგტონში, მასპინძელ უნივერსიტეტში და შემდეგ გაემგზავრება პორტლენდში, ორეგონში, რათა დაესწროს ერთკვირიან პროგრამას - 2023 TESOL International convention-ს.
პროგრამა მიზნად ისახავს მსოფლიოს ოცდახუთი ქვეყნის წარმომადგენლებს შორის კომუნიკაციას, გამოცდილების გაზიარებას, ადგილობრივი სკოლების გაცნობასა და პრაქტიკული ცოდნითა და უნარებით მასწავლებელთა აღჭურვას.
აღსანიშნავია, რომ პროგრამა სრულად ფინანსდება ამერიკის სახელმწიფო დეპარტამენტის მიერ.
