აკაკი ჩხენკელის სახელობის ხონის N2 საჯარო სკოლაში პედაგოგები მოსწავლეთა უნარების გაუმჯობესებაზე ზრუნავენ. ამ მიზნით, ისინი ბავშვებს საინტერესო და მრავალფეროვან გაკვეთილებს სთავაზობენ.
სწორედ ამის მაგალითია, ინტეგრირებული გაკვეთილი - „ვმუშაობთ კომპიუტერულ პროგრამებში“, რომელიც ხელოვნების მასწავლებელმა, ია კინწურაშვილმა, კომპიუტერული ტექნოლოგიების პედაგოგ თამარ ჩხენკელითან ერთად მე-8ბ კლასში ჩაატარა.
როგორც სკოლაში გვიყვებიან, მერვეკლასელებმა დავალების პირობის მიხედვით, საყვარელი მხატვრის ნამუშევრები ინტერნეტში მოიძიეს, რომლის ასლიც კომპიუტერში შეინახეს. მათ შემდგომ სურათი პროგრამაში - Paint გახსნეს. მოსწავლეებმა ამოჭრეს სურათიდან ფიგურები, გადაიტანეს Word-ის ფაილში და შეინახეს, შემდეგ ფაილი გახსნეს და ამ ფიგურებისაგან სხვადასხვა სახის კომპოზიციები: ფრიზული, სიმეტრიულად გაწონასწორებული და ფრაგმენტული შექმნეს.
მოსწავლეებმა ტექნიკური უნარები და შესაძლებლობები წარმოაჩინეს. გაკვეთილი მათთვის საინტერესო, ნაყოფიერი და სახალისო იყო.
აღსანიშნავია, რომ მსგავსი გაკვეთილები და აქტივობები მოსწავლეებში კომპიუტერული უნარ-ჩვევების გაუმჯობესებას ხელს უწყობს. ისინი კომპიუტერულ პროგრამებში მუშაობას ეჩვევიან და მოტივაცია უმაღლდებათ.
იხილეთ ფოტოები:
