თეთრიწყაროს მუნიციპალიტეტის სოფელ შავსაყდრის საჯარო სკოლაში წიგნის საჯაროდ კითხვის მსოფლიო დღე საინტერესოდ აღინიშნა.
მოსწავლეები, მასწავლებელ ნანა თეგაძის ინიციატივით, დევიზით - „კარგი წიგნით ხელში ადამიანი არასოდეს იქნება მარტო“, შეიკრიბნენ, რათა ამ დღისადმი მიძღვნილ ღონისძიებაში მიეღოთ მონაწილეობა.
მოსწავლეებმა და პედაგოგმა, ღონისძიების თემასთან დაკავშირებით, დახმარება სთხოვეს ქართული ენისა და ლიტერატურის პედაგოგს - მანანა ხუციშვილს და ხელოვნების პედაგოგს - თეა საათაშვილს, რომელთაც გზამკვლევის როლი გაითავისეს.
როგორც სკოლაში გვიყვებიან, მე-8 და მე-9 კლასის მოსწავლეებმა თემად აირჩიეს - „ჩვენი აფხაზეთი“ და სურვილი გამოთქვეს წაეკითხათ მათთვის კარგად ნაცნობი მწერლის აფხაზეთიდან დევნილი, სკოლისთვის ძვირფასი ქალბატონის - ნატო კორსანტიას წიგნები.
„ბავშვები რეალურად არ იცნობენ აფხაზი ხალხის ცხოვრებას, ამიტომ გადაწყვიტეს წაეკითხათ ეს ლიტერატურა. წაიკითხეს ქალბატონი ნატოს ავტორობით გამოცემული წიგნები -„წართმეული ხმები“, „გალაქტიონი, ზღვა და აფხაზეთი“ და „ჩემი სახლი“. მოსწავლეებმა დიდი ინტერესი გამოიჩინეს და კედლის გაზეთიც გამოუშვეს“,- აღნიშნავენ სკოლაში.
იხილეთ ფოტოები:
