ოზურგეთის მუნიციპალიტეტის დაბა ლაითურის საჯარო სკოლა ღირსეულ მოქალაქეებს ზრდის. სკოლაში მოსწავლეთა ცნობიერების ამაღლების მიზნით, მრავალფეროვანი საგანმანათლებლო ღონისძიებები იმართება. სკოლაში წარმატებით ფუნქციონირებს სამოქალაქო განათლების კლუბი - „თავისუფლება“, რომლის წევრებიც სხვადასხვა აქტივობაში დიდი ენთუზიაზმით არიან ჩართულნი.
მათ შორის, კლუბის წევრები, USAID-ის სამოქალაქო განათლების პროგრამის ფარგლებში, გენდერული ძალადობის წინააღმდეგ ბრძოლის 16-დღიან გლობალურ კამპანიას შეუერთდნენ.
გენდერული ძალადობის წინააღმდეგ მიმართული 16-დღიანი კამპანია მთელს მსოფლიოში 1991 წლიდან იმართება. კამპანია 25 ნოემბერს - ქალთა მიმართ ძალადობის აღმოფხვრის საერთაშორისო დღეს დაიწყო და 10 დეკემბერს - ადამიანის უფლებათა დაცვის საერთაშორისო დღეს დასრულდა.
აქციის - „16 დღე გენდერული ძალადობის წინააღმდეგ“ მთავარ მიზანს წარმოადგენს საზოგადოების ყურადღების მიქცევა ორ აქტუალურ პრობლემაზე: ოჯახში ძალადობისა და ადამიანებით ვაჭრობის პრევენცია და მათთვის წინააღმდეგობის გაწევა, ასევე სახელმწიფო ინსტიტუტებისა და საზოგადოებრივი გაერთიანებების საქმიანობის გააქტიურება ადამიანის უფლებების დასაცავად.
კამპანიის ფარგლებში სკოლაში გაიმართა შემდეგი ღონისძიებები:
- უფროს კლასებში მოეწყო საინფორმაციო ხასიათის შეხვედრები. შეხვედრის განხილვის თემა გახლდათ - ქალთა მიმართ ძალადობა საქართველოში და მისგან გამოწვეული პრობლემები;
- აღნიშნულ თემაზე მოსწავლეებმა დაამზადეს ბუკლეტები და სკოლასა და თემში დაარიგეს;
- გაიმართა ფილმის - „სორაიას ჩაქოლვა“ ჩვენება. კინოჩვენების შედეგ კი მოეწყო დისკუსია;
- ასევე მოეწყო ქალთა ძალადობის წინააღმდეგ ფლეშმობი. ასევე ფლეშმობით აღინიშნა შიდსთან ბრძოლის საერთაშორისო დღე;
- სხვადასხვა კლასში ჩატარდა ადამიანის უფლებათა საერთაშორისო დღისადმი მიძღვნილი საინფორმაციო შეხვედრები.
