სამტრედიის მუნიციპალიტეტის სოფელ ნაბაკევის საჯარო სკოლაში კლუბი „პატარა ექიმები“ წარმატებით მუშაობს.
კლუბის წევრები საბაზო საფეხურის მოსწავლეებისთვის ბევრ საინტერესო აქტივობასა და შეხვედრას აწყობენ.
კლუბის დამაარსებელმა, ბიოლოგიის წამყვანმა პედაგოგმა - მარი ყენიამ, კლუბის სამუშაო გეგმაში გაწერა ისეთი ტიპის აქტივობები, რომლის შედეგად მოსწავლეებს შეაყვარებს საგანს, აუმაღლებს ცნობიერებას და გამოუმუშავებს ისეთ უნარ-ჩვევებს, რაც მომავალში პრაქტიკაში გამოადგებათ.
ამჯერად, კლუბის დამფუძნებელმა შეხვედრა მიუძღვნა მსოფლიოში ერთ-ერთ ყველაზე გავრცელებულ დაავადებას დიაბეტს.
პედაგოგთან ერთად მოსწავლეებს დაავადების შესახებ ინფორმაცია მიაწოდა სკოლის ექიმმა მადლენა თევზაძემ და ცნობილმა ენდოკრინოლოგმა - ლაშა უჩავამ.
შეხვედრა კითხვა-პასუხის რეჟიმში გაიმართა და უდიდესი დაინტერესება გამოიწვია მოსწავლეებში.
როგორც სკოლაში გვეუბნებიან, მსგავსი შინაარსის შეხვედრები მომავალშიც არის ჩანიშნული კლუბის სამუშაო გეგმაში.
იხილეთ ფოტოები:
