ქართველი სტუდენტები ჩინეთის წამყვან უნივერსიტეტებში ისწავლიან

2016-2017 სასწავლო წელს, საქართველოს განათლებისა და მეცნიერების სამინისტროს წარდგენითა და ჩინეთის მხარის გადაწყვეტილებით, ჩინეთის სხვადასხვა უმაღლეს საგანმანათლებლო დაწესებულებაში 20 ქართველი სტუდენტი ისწავლის. შესაბამისი სტიპენდიები ჩინეთის სახალხო რესპუბლიკის განათლების სამინისტროსა და საქართველოს განათლების სამინისტროს შორის ხელმოწერილი თანამშრომლობის მემორანდუმის ფარგლებში გამოიყო.

ჩინეთის მთავრობამ 20 სრული სტიპენდია ქართველი სტუდენტებისთვის სხვადასხვა მიმართულებების საბაკალავრო, სამაგისტრო, სადოქტორო და სამეცნიერო (მკვლევარი, უფროსი მკვლევარი-General Scholar, Senior Scholar) პროგრამებზე სწავლისათვის გამოყო. კონკურსის წესით შერჩეულ სტუდენტებს საქართველოს განათლებისა და მეცნიერების მინისტრის მოადგილე გიორგი შარვაშიძე შეხვდა, პროგრამასთან დაკავშირებით მათ დამატებითი ინფორმაცია მიაწოდა და რეკომანდაციები მისცა.