ყვარლის მუნიციპალიტეტის სოფელ გავაზის საჯარო სკოლაში მოსწავლეთა წიგნიერების დონის ამაღლებას უდიდესი ყურადღება ექცევა. ამ მიზნით, სკოლის დირექცია და პედაგოგები მომავალ თაობას არაერთ საგანმანათლებლო ღონისძიებასა თუ აქტივობას სთავაზობენ, ბავშვებს წიგნს აყვარებენ და ასწავლიან კითხვის კულტურას.
სკოლაში შთამბეჭდავი პროექტი - „აჩუქე წიგნი, შექმენი კლასის ბიბლიოთეკა“ ხორციელდება. რომელშიც მე-9 კლასის მოსწავლეები არიან ჩართულნი. მე-9 კლასელებმა წიგნის ჩუქების ტრადიციას ჩაუყარეს საფუძველი და საკლასო ბიბლიოთეკის წიგნადი ფონდის შევსება დაისახეს მიზნად.
„წიგნიერების საერთაშორისო კვლევის შედეგებით, ქართველ მოზარდთა წიგნიერების დონე საშუალოზე დაბალია. მოსწავლის წიგნიერებაში მნიშვნელოვან როლს ასრულებს ეკონომიკური ფაქტორი. ამ დროს კი მნიშვნელოვანია საგანმანათლებლო რესურსების თანაბარი ხელმისაწვდომობა. წიგნიერების დონის ასამაღლებლად, ყვარლის მუნიციპალიტეტის სოფელ გავაზის საჯარო სკოლის მე-9 კლასში არა ერთჯერადად, არამედ წელიწადში რამდენჯერმე დავთქვით ერთმანეთისათვის წიგნის ჩუქება, აღნიშნულის ტრადიციად დანერგვა და ჩვენი წიგნადი ფონდის შევსება. პირველ ეტაპზე გარკვეული რაოდენობის წიგნი შევიდა ჩვენს საკლასო ბიბლიოთეკაში. მოსწავლეებმა ინდივიდუალური ინტერესების გათვალისწინებით ერთმანეთისთვის შეიძინეს წიგნები. დაევალათ, მოეფიქრებინათ, რატომ ჩუქნიდნენ მაინცდამაინც ამ კონრეტულ წიგნს (მცირე ანოტაციის სახით) და რას წაუწერდნენ სამახსოვროდ. მოსაფიქრებლად ჰქონდათ ორი კვირა. „აჩუქე წიგნი, შექმენი კლასის ბიბლიოთეკა“ წარმატებით დაიწყო. ნაჩუქარ წიგნებს წაიკითხავენ, დროდადრო გაცვლიან და თან ერთმანეთს გაუზიარებენ წაკითხულ შთაბეჭდილებებს“, - აღნიშნავენ სკოლაში.
იხილეთ ფოტოები:
