„პედაგოგის პროფესია უდიდესი პასუხისმგებლობაა, რომ  თითოეულ მოსწავლეს სიკეთე ასწავლო“ - ეს სიტყვები წალენჯიხის მუნიციპალიტეტის საჩინოს თემის N2 საჯარო სკოლის პედაგოგ ირმა ლომაიას ეკუთვნის. მისთვის ყველაზე დიდი მოტივაცია მოსწავლეთა წარმატებაა.

კოლეგის რომელი რჩევა ახსოვს განსაკუთრებულად და რას მიიჩნევს საგანმანათლებლო სფეროში ყველაზე რთულად? - ამ და სხვა საინტერესო კითხვებზე  პასუხებს ირმა ლომაიასთან ბლიც-ინტერვიუში ამოიკითხავთ.

- თქვენი საყვარელი ფრაზა...

-  სრულყოფილება არ არსებობს, ყოველთვის შეგიძლია უკეთ  გააკეთო და განვითარდე.

- რას ნიშნავს თქვენთვის პედაგოგის პროფესია?

-  უდიდესი პასუხისმგებლობაა, რომ თითოეულ მოსწავლეს სიკეთე ასწავლო, ადამიანების მიმართ დამოკიდებულებისას საკუთარი მაგალითი აჩვენო.

- ბავშვებთან ეფექტური კომუნიკაცია არის...

- მათი მოსმენა და გადაწყვეტილების ერთად მიღება.

- კოლეგის რჩევა, რომელიც განსაკუთრებით მახსოვს...

- თუ შენს ვალდებულებებს ყოველდღე პირნათლად შეასრულებ, აუცილებლად იქნები წარმატებული.

- საგანმანათლებლო სფეროში ყველაზე რთულია...

- ფეხი აუწყო თანამედროვე მოთხოვნების ხშირ ცვლილებას, თუმცა მაქსიმალურად ვაკეთებ, რაც შემიძლია.

- მოტივაციას მაძლევს...

- მოსწავლეთა კარგი შედეგები.

- კმაყოფილი ვარ, როდესაც სკოლაში...

- არის თბილი და თანამშრომლობითი გარემო.