თბილისის N49 საჯარო სკოლაში საქართველოს ისტორიაში მნიშვნელოვან თარიღებს მუდამ განსაკუთრებულ და მრავალფეროვან ღონისძიებებს უძღვნიან.

ამჯერად, სკოლაში 14 აპრილის დედაენის დღესთან დაკავშირებით I-XII კლასების ჩათვლით სხვადასხვა ღონისძიებები დაიგეგმა და განხორციელდა.

მრავალფეროვან აქტივობებს შორის იყო: კალიგრაფიის კონკურს - „მე ვწერ ქართულად“, პროექტი - „ენა დედაა ერისა“ და საშუალო საფეხურზე დედაენის დღისადმი მიძღვნილი კონფერენცია.

14 აპრილს, საქართველოში დედაენის დღე აღინიშნება. ეს დღე 1990 წელს, 1978 წლის 14 აპრილის მოვლენების აღსანიშნავად, დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა.

იხილეთ ფოტოები: