ფრიდონ მახარაძის სახელობის შუახევის მუნიციპალიტეტის სოფელ მახალაკიძეების საჯარო სკოლაში 9 აპრილს ღონისძიება მიეძღვნა.
მოსწავლეებმა პატრიოტული თემატიკის ლექსები წაიკითხეს, 9 აპრილის ტრაგიკულ მოვლენებზე ისაუბრეს და საქართველოს თავისუფლებისთვის დაღუპულ გმირთა ხსოვნას პატივი მიაგეს. სასკოლო საზოგადოების წინაშე სიტყვით გამოვიდა 9 აპრილის მონაწილე მასწავლებელი შოტა ფუტკარაძე.
ღონისძიება პედაგოგ თებრონე ბერიძის ხელმძღვანელობით ჩატარდა.
აღსანიშნავია, რომ წელს 9 აპრილის ტრაგედიიდან 33 წელი გავიდა. 1989 წლის 9 აპრილს საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს, რა დროსაც დაიღუპა 21 ადამიანი, ასობით მოქალაქე კი დაუდგენელი შემადგენლობის გაზით მოიწამლა.
მოგვიანებით, 1991 წლის 9 აპრილს უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა. 9 აპრილი საქართველოს ისტორიაში ტრაგედიისა და ამავდროულად, საქართველოს დამოუკიდებლობის აღდგენის დღედაა მიჩნეული.
იხილეთ ფოტოები:
