„გაიფერადე დღე და გაიცანი ახალი ადამიანები“ - ეს თბილისში, მთაწმინდის პარკში დაგეგმილი „ჰოლის“ ფესტივალის მთავარი მესიჯია. ასეთი მასშტაბებითა და ორგანიზებით გამართული ფერების ფესტივალი, საქართველოში წელს პირველად ჩატარდება. ღონისძიების ერთ-ერთი სპონსორი, კავკასიის საერთაშორისო უნივერსიტეტია, რომლის სტუდენტები, როგორც საორგანიზაციო, ასევე მუსიკალური და საცეკვაო ნომრებით ჩაერთვებიან ფესტივალში.

„ჰოლი“- დღესასწაული, როდესაც შავი ფერი არავის ახსოვს - მხიარული, ფერადი, სიყვარულისა და მეგობრობის დღესასწაულია, რომელიც გაზაფხულის დადგომის სიმბოლოდ ითვლება და საუკუნეებია, რაც ინდოეთში აღინიშნება.

„ჰოლის“ ორგანიზების საქმეს - „კულტურული მრავალფეროვნება მშვიდობიანი მომავლისთვის“ დამფუძნებელი და  კსუ-ს რექტორის მრჩეველი საერთაშორისო ურთიერთობებში - დარპან პრაშერი ხელმძღვანელობს.

ფერების დღესასწაული 4 მარტს, 14:00 საათზე მთაწმინდის პარკში გაიხსნება და მასში მონაწილეობა ნებისმიერ მსურველს უფასოდ შეეძლება. ღონისძიების სტუმრებს საშუალება ექნებათ, ინდური ტკბილეული დააგემოვნონ, ქართული ღვინო მიირთვან და ქართულ-ინდური საცეკვაო და მუსიკალური ნომრებით ისიამოვნონ.

ფესტივალს, სპეციალურად ამ ღონისძიებისათვის მოწვეული ინდური ტელევიზია - ,„news nation“ გააშუქებს.