საგარეჯოს მუნიციპალიტეტის სოფელ ბადიაურის საჯარო სკოლის ეკოკლუბი - „ედელვაისი“ გარემოსდაცვითი კონკურსის - „ნიკო კეცხოველის სასკოლო პრემია“ ფინალში მონაწილეობდა.
სკოლის ეკოკლუბმა კონკურსის ფარგლებში არაერთი საინტერესო აქტივობა განახორციელა და სურსათის ეროვნული სააგენტოსგან საჩუქრად პროექტორი დაიმსახურა.
„პირველი წარმატება ბადიაურის სკოლას. სურსათის ეროვნული სააგენტოდან - პრიზი, პროექტორი“, - წერია სკოლის განცხადებაში.
შეგახსენებთ, რომ ახალგაზრდული გარემოსდაცვითი კონკურსი - ნიკო კეცხოველის სასკოლო პრემია - 2015 წელს CENN-ის მიერ დაარსდა, პროექტის - ტყის მდგრადი მართვა საქართველოში - ფარგლებში, ავსტრიის განვითარების თანამშრომლობის /Austrian Development Cooperation ფინანსური მხარდაჭერით.
კონკურსის თანაორგანიზატორები არიან: საქართველოს განათლების, მეცნიერების, სპორტისა და კულტურის სამინისტრო, საქართველოს გარემოს დაცვისა და სოფლის მეურნეობის სამინისტრო, საქართველოს პარლამენტი.
