ოზურგეთის მუნიციპალიტეტის სოფელ ლიხაურის საჯარო სკოლის კომპიუტერული ტექნოლოგიების პედაგოგი ხათუნა ცეცხლაძე სწავლების დისტანციურ ფორმატთან დაკავშირებით საუბრობს. 

მისი თქმით, მისთვის სწავლების ეს ფორმატი ხელსაყრელი აღმოჩნდა, რაც სწავლების გასაუმჯობესებლად ინფორმაციისა და კომუნიკაციის ტექნოლოგიის (ICT) გამოყენებას გულისხმობს.

„კოვიდ 19-ის პანდემიამ ახალი რეალობის წინაშე დაგვაყენა. რა თქმა უნდა, დისტანციური სწავლება ინტერნეტის გამოყენებით არ არის სიახლე, მაგრამ ეს ჩვენს ქვეყანაში 2020 წელს გახდა შესაძლებელი და მასწავლებლებიც გმირულად შევხვდით ამ გამოწვევას. თავი არ დავზოგეთ და ყველა სიახლე გავითავისეთ.
ჩემთვის, როგორც კომპიუტერული ტექნოლოგიების მასწავლებლისთვის, ელექტრონული სწავლება ხელსაყრელი გამოდგა, რაც გულისხმობს სწავლების გასაუმჯობესებლად ინფორმაციისა და კომუნიკაციის ტექნოლოგიის (ICT) გამოყენებას (მაგ.კომპიუტერის გამოყენება დავალების დასამუშავებლად). თუმცა სივრცეში დაშორებულები ვართ მე და ჩემი მოსწავლეები, მაგრამ დისტანციურადაც მშვენივრად ვახერხებთ ჩვენს გასაკეთებელ საქმეს.
წელს სიახლეები გვაქვს ამ საგანში, რითაც ვფიქრობ ძალიან დავაინტერესებ ჩემ მოსწავლეებს“,- წერს ლიხაურის საჯარო სკოლის კომპიუტერული ტექნოლოგიების პედაგოგი ხათუნა ცეცხლაძე.