ბოლო ზარის ტრადიცია საქართველოში დიდი ხანია არსებობს. სასწავლო წლის დასრულების შემდეგ ღონისძიება სკოლებში იმართება და მისი მთავარი გმირები გამოსაშვები კლასის მოსწავლეები არიან. მასწავლებლები კი ბავშვებს სკოლის დამთავრებასა და ახალი ცხოვრების დაწყებას ულოცავენ.

ესაა დღე, როდესაც 12 წლის განმავლობაში დაგროვილი მოგონებები ერთად იყრის თავს, არის აჭრელებული თეთრი პერანგები, კეთილი სურვილები და ცოტა ცრემლიც... ბავშვები სკოლის კედლებს ემშვიდობებიან; ენანებათ უზრუნველ წლებთან გამომშვიდობება და ამასთანავე, უხარიათ ახალ საფეხურზე გადაბიჯება - წინ შეუცნობელი სამყარო ელით, მეტი პასუხისმგებლობით, ცხოვრებისეული ბარიერებითა და უამრავი წარმატებით.

ბოლო ზარი დაირეკა ნიკო მარის სახელობის, დაბა ჩოხატაურის N1 საჯარო სკოლაშიც.

„ყველა დაბრკოლების მიუხედავად გავაცილეთ 137-ე გამოშვება, 52 ნიჭიერი, გონიერი, ენერგიული გოგო-ბიჭი. გილოცავთ! გვჯერა, არსებული რეალობა დაგაფიქრებთ, თქვენს შესაძლებლობებს მიზნობრივად გამოიყენებთ და თქვენს სიტყვას იტყვით ამ საუკუნის აღმშენებლობაში, იქნებით სამართლიანები და გულწრფელები. ვულოცავთ თქვენს აღმზრდელ პედაგოგებს და მშობლებს, მუდამ ეამაყოთ თქვენით“, - აღნიშნულია სკოლის მიერ გავრცელებულ ინფორმაციაში.

იხილეთ ფოტოები: