ნინოწმინდის მუნიციპალიტეტის სოფელ ორლოვკის საჯარო სკოლაში მნიშვნელოვან თარიღებს ყოველთვის აღნიშნავენ და აქტივობებში მოსწავლეებიც დიდი მონდომებით ერთვებიან.

სკოლის დირექტორის არაქელ სეირანიანისა და პედაგოგების ორგანიზებით, ამჯერად, ბავშვთა დაცვის დღე იზეიმეს. ღონისძიება რეგულაციების სრული დაცვით, ღია ცის ქვეშ გაიმართა. მოსწავლეები სკოლის ეზოში შეიკრიბნენ და უამრავ სპორტულ თუ სახალისო აქტივობაში ჩაერთნენ.

სკოლის მოსწავლეებმა 1 ივნისს შემოქმედებითი ნიჭიც წარმოაჩინეს. შესრულდა მუსიკალური და ქორეოგრაფიული ნომრები.

ბევრი მხიარულებითა და დიდი ჟრიამულით სავსე დღე ნამდვილად დასამახსოვრებელი გამოდგა მოსწავლეებისთვის.

ცნობისთვის, პირველად, ბავშვთა დაცვის საერთაშორისო დღე, 1950 წლის 1 ივნისს იზეიმეს, რის შემდეგაც იგი ყოველ წელს მთელ მსოფლიოში აღინიშნება. 

ამ დღეს მხოლოდ გასართობი ხასიათი არ აქვს, ეს დღე შეხსენებაა იმისა, რომ ყველა ბავშვი ჯანსაღ და უსაფრთხო გარემოში უნდა იზრდებოდეს, სადაც მას სრულყოფილი განათლებისა და ყველა საჭირო სიკეთის მიღება შეუძლია.