„მიმდინარე 2020-2021 სასწავლო წელი თბილისის 118-ე საჯარო სკოლაშიც, ისევე, როგორც სკოლების უმეტესობაში, სასწავლო პროცესი დისტანციურად დაიწყო. მე, როგორც პირველი კლასის მასწავლებელი და დამრიგებელი, ძალიან განვიცდიდი, როგორ უნდა მესწავლებინა წერა-კითხვა ბავშვებისთვის, რომლებსაც ფიზიკურადაც კი არ ვიცნობდი. მაგრამ ბავშვების მონდომებითა და მშობელთა აქტიური ჩართულობის წყალობით, ყველაფერი კარგად და წარმატებით დავასრულეთ. წერა-კითხვასთან და თვლა-ანგარიშთან ერთად, ბევრი სხვა საინტერესო კლასგარეშე აქტივობა, პროექტი და კომპლექსური დავალებაც განვახორციელეთ.

ონლაინ ვიზეიმეთ ახალი წელი. დედიკოებსაც მივულოცეთ დედის დღე. გავიხსენეთ 9 აპრილის გმირები და პირველკლასელების შესაძლებლობებიდან გამომდინარე, ბრძოლა გამოვუცხადეთ ბარბარიზმებს. ჩვენი პატარა ხელებით დავეხმარეთ დედამიწას ნარჩენებისგან გათავისუფლებაში და საქართველოს მივულოცეთ დამოუკიდებლობის დღე.

ყოველივე ეს, ერთ ლამაზ ფოტოკოლაჟად ავკინძეთ და გილოცავთ 1 ივნისს!“.