ესაა დღე, როდესაც 12 წლის განმავლობაში დაგროვილი მოგონებები ერთად იყრის თავს, არის აჭრელებული თეთრი პერანგები, კეთილი სურვილები და ცოტა ცრემლიც... ბავშვები სკოლის კედლებს ემშვიდობებიან; ენანებათ უზრუნველ წლებთან გამომშვიდობება და ამასთანავე, უხარიათ ახალ საფეხურზე გადაბიჯება - წინ შეუცნობელი სამყარო ელით, მეტი პასუხისმგებლობით, ცხოვრებისეული ბარიერებითა და უამრავი წარმატებით.
ბოლო ზარის ტრადიცია საქართველოში დიდი ხანია არსებობს. სასწავლო წლის დასრულების შემდეგ ღონისძიება სკოლებში იმართება და მისი მთავარი გმირები გამოსაშვები კლასის მოსწავლეები არიან. მასწავლებლები კი ბავშვებს სკოლის დამთავრებასა და ახალი ცხოვრების დაწყებას ულოცავენ.
მეთორმეტეკლასელებისთვის ბოლო ზარი დაირეკა თბილისის N54 საჯარო სკოლაშიც; მასწავლებელი მანანა ზარიძე გამოემშვიდობა მ-12 „ა“ კლასის მოსწავლეებს, რომლებმაც 12 წლის წინ, სულ პაწაწუნებმა შეაღეს მშობლიური სკოლის კარი და ახლა უკვე სრულწლოვნები გადადიან ცხოვრების ახალ ეტაპზე.
