ბოლო ზარის ტრადიცია საქართველოში დიდი ხანია არსებობს. სასწავლო წლის დასრულების შემდეგ ღონისძიება სკოლებში იმართება და მისი მთავარი გმირები გამოსაშვები კლასის მოსწავლეები არიან. მასწავლებლები კი ბავშვებს სკოლის დამთავრებასა და ახალი ცხოვრების დაწყებას ულოცავენ.

ესაა დღე, როდესაც 12 წლის განმავლობაში დაგროვილი მოგონებები ერთად იყრის თავს, არის აჭრელებული თეთრი პერაგები, კეთილი სურვილები და ცოტა ცრემლიც... ბავშვები სკოლის კედლებს ემშვიდობებიან; ენანებათ უზრუნველ წლებთან გამომშვიდობება და ამასთანავე, უხარიათ ახალ საფეხურზე გადაბიჯება - წინ შეუცნობელი სამყარო ელით, მეტი პასუხისმგებლობით, ცხოვრებისეული ბარიერებითა და უამრავი წარმატებით.

კურსდამთავრებულებისთვის ბოლო ზარი დაირეკა ვანის N1 საჯარო სკოლაში. სრულიად სასკოლო საზოგადოებამ უსაყვარლესი მოსწავლეები ცხოვრების ახალ ეტაპზე სევდანარევი სიხარულითა და დიდი სიყვარულით გააცილა.

„კიდევ ერთხელ, მოგილოცავთ, ბავშვებო, სკოლის დასრულებას. წარმატებებსა და წინსვლას გისურვებთ მუდამ. თქვენმა წინამორბედებმა არაერთხელ ასახელეს ჩვენი სკოლა, მუნიციპალიტეტისა და ქვეყნის მასშტაბით. უდიდესი სურვილი მაქვს, ეროვნულ გამოცდებზე გაიმეოროთ ის შედეგები!!!

დარწმუნებული ვარ, თქვენ შეძლებთ დასახული მიზნის მიღწევას და პროფესიონალ კადრებად მოევლინებით 21-ე საუკუნის საქართველოს.

წარმატებებს გისურვებთ, წარმატებულთა შორის“, - ასე, ემოციურად გამოემშვიდობა უსაყვარელს ბავშვებს ვანის N1 საჯარო სკოლის დირექტორი, ვალერი კანკაძე.

იხილეთ ფოტოები