ახალციხის მუნიციპალიტეტის ვალის N3 საჯარო სკოლაში, დედაენის დღესთან დაკავშირებით, ღონისძიება ჩატარდა. 

ღონისძიებას ქართულის, როგორც მეორე ენის მასწავლებელი მაყვალა ლობჟანიძე - სევასტოვა ხელმძღვანელობდა.

პირველი და მესამე კლასის მოსწავლეებმა ლექსები წაიკითხეს, საბაზო და საშუალო საფეხურის მოსწავლეებმა კი, ქართულის, როგორც მეორე ენის მასწავლებლების- მაია კაკაჩიშვილის და სიუზანნა ბიჩახჩიანის დახმარებით, პოსტერი დაამზადეს.

14 აპრილს, საქართველოში „დედა ენის“ დღე აღინიშნება. ეს დღე 1990 წელს, 1978 წლის 14 აპრილის მოვლენების აღსანიშნავად, დაწესდა. 

1978 წლის 14 აპრილს კონსტიტუციაში სახელმწიფო ენის შესახებ ჩანაწერის ცვლილების წინააღმდეგ თბილისში სტუდენტური მანიფესტაციები დაიწყო. ცვლილების თანახმად, საქართველოს რესპუბლიკაში ქართული ენის, როგორც სახელმწიფო ენის სტატუსი უქმდებოდა. მანიფესტაციების შედეგად, ქართულ ენას სახელმწიფო ენის სტატუსი შეუნარჩუნდა.

საბჭოთა კავშირის ხელისუფლებამ გააცნობიერა‚ რომ მხოლოდ ორი გამოსავალი იყო - სისხლისღვრა ან დათმობა და მოსკოვი იძულებული შეიქმნა დაეთმო. ამ მოვლენების გამო 14 აპრილი არაოფიციალურად დედაენის დღედ გამოცხადდა.

იხილეთ ფოტოები