წყალტუბოს N1 საჯარო სკოლამ, ყველა გამოწვევა, რომლის წინაშეც პანდემიის გამო აღმოჩნდა საგანმანათლებლო სისტემა, წარმატებით დაძლია, დღეს კი შეუძლია იამაყოს წარმატებული გუნდითა და წარმატებული ხელმძღვანელით. ფაქიზო ფანჩულიძე-კუჭავა, წყალტუბოს N1 საჯარო სკოლის დირექტორი, Etaloni.ge-სთან ბლიც-ინტერვიუში იმაზე საუბრობს, როგორ გაუმკლავდნენ ყველა წინააღმდეგობას და როგორ არ იშურებენ ძალისხმევას, რათა წარმატებული, განათლებული მომავალი თაობები აღუზარდონ ქვეყანას.
- კოვიდ-პანდემიამ დაგვანახა...
- რაოდენ ძვირფასია თითოეული ადამიანის სიცოცხლე. ის, რომ ადამიანურ ურთიერთობებსა და პანდემიამდელ ცხოვრებას ჯეროვნად არ ვაფასებდით... და რომ ერთმანეთს უნდა გავუფრთხილდეთ...
- ონლაინ სწავლებამ გვასწავლა...
- ამ მიმართულებით ბევრმა პრობლემამ იჩინა თავი. მასწავლებლებს გადამზადება სჭირდება - თითოეული მათგანი უნდა ფლობდეს კომპიუტერულ ტექნოლოგიებს და იცნობდეს ახალ ეროვნულ სასწავლო გეგმას ონლაინ სწავლებისთვის.
- 2020 წელს დავახასიათებდი...
- იყო საკმაოდ რთული წელიწადი, სწავლა-სწავლების კუთხით, ვიყავით დასტრესილები და დაძაბულები ამდენი ახლობელი ადამიანის გარდაცვალებით, სახლში ჩაკეტვით, თითქმის უმოქმედობით.
- მასწავლებლებისგან ყველაზე ხშირად მიხარია...
- მზაობა ნებისმიერ სიტუაციაში სწავლა-სწავლების პროცესის გაგრძელებისათვის, მათი ერთმანეთისა და სკოლის მიმართ თანადგომა, მოსწავლეებსა და მათ მშობლებთან ჯანსაღი კომუნიკაცია.
- მოსწავლეებისგან ყველაზე მეტად მიკვირს...
- როცა ნაკლებად აქვთ მზაობა ონლაინ სწავლებისთვის და სერიოზულად არ აღიქვამენ მსოფლიოში შექმნილ პანდემიურ მდგომარეობას, ნაკლებად აქცევენ ყურადღებას COVID-19-ის პრევენციული ზომების დაცვას.
- მშობლებს ვურჩევდი...
- მეტად ესაუბრონ შვილებს COVID-19-ის პრევენციული ზომების დაცვაზე. ყურადღება გამოიჩინონ შვილების ონლაინ სწავლებისას. გაკვეთილებში მათ ჩართულობაზე, იცოდნენ და აკონტროლებდნენ მათ დღის რეჟიმს.
- ყველაზე ხშირად ვფიქრობ...
- მაქსიმალურად გამოვიყენოთ დრო. ჩვენ, ქართველებმა, არ ვიცით დროის ეფექტური გამოყენება... რომ ყველა წუთი ძვირფასია. ჩვენი სიცოცხლე ჩვენ არ გვეკუთვნის მხოლოდ, გვეძლევა იმისათვის, ჩვენს ხალხსა და ქვეყანას გამოვადგეთ, როგორც ტატო იტყოდა:
„არც კაცი ვარგა, რომ ცოცხალი მკვდარსა ემსგავსოს
იყოს სოფელში და სოფლისთვის არა იზრუნოს“.
