მასწავლებლები მუშაობენ მეტს და პროფესიულ გადაწვას განიცდიან - ასეთი შედეგები აჩვენა ამერიკულმა კვლევამ. ოქტომბერში არაკომერციულმა ორგანიზაციამ - RAND ამერიკის სკოლის მასწავლებლების და დირექტორების გამოკითხვა ჩაატარა, რომელიც COVID-19-ის ჟამს მათ მუშაობას შეეხებოდა. გთავაზობთ ამ კვლევის ყველაზე საინტერესო რიცხვებს.
რა გავლენა მოახდინა COVID-19-მა ამერიკულ სკოლებზე?
ამერიკული სკოლების უმეტესობამ სწავლების დისტანციური ფორმის გამოყენება ჯერ კიდევ 2020 წლის გაზაფხულზე დაიწყო. პედაგოგები თვლიან, რომ სწავლების ხარისხმა დაიწია მას შემდეგ, რაც სკოლები დაიხურა.
გამოკითხვამ აჩვენა, რომ COVID-19 სწავლის ხელმისაწვდომობას განსაკუთრებით უზღუდავს სოციალურად დაუცველი ოჯახების ბავშვებს.
როგორ მუშაობენ დღეს ამერიკული სკოლები?
აშშ-ს უმეტესი სკოლები დღეს ან სრულიად დისტანციურად ან შერეული ფორმატით მუშაობენ:
დირექტორების 33% აცხადებს, რომ მათი მოსწავლეები სწავლობენ მთლიანად დისტანციურად;
47% სკოლა შერეული ფორმატით მუშაობს.
დირექტორების 20% ამბობს, რომ მათი მოსწავლეების უმეტესობას აქვს მასწავლებელთან ცოცხალი შეხვედრის შესაძლებლობა. ეს ეხება ძირითადად მცირე ქალაქების პატარა სკოლებს.
როგორია მოსწავლეთა დასწრება და როგორ ასრულებენ ისინი დავალებებს?
მასწავლებლების თქმით, სექტემბერ-ოქტომბერში, დისტანციური სწავლებისას, მოსწავლეების მხოლოდ 69% ასრულებდა ყველა დავალებას ან მათ უმეტესობას.
შემოდგომაზე გაკვეთილებს მოსწავლეთა 86% ესწრებოდა. მოსწავლეთა დასწრების მაჩვენებელი სკოლებში სადაც ცოცხალი დასწრებაა უფრო მაღალია - 91%. შედარებისთვის, ჩვეულებრივ, ამერიკულ სკოლებში დასწრება ბოლო 5 წლის მანძილზე 94-95% შეადგენდა.
როგორ გრძნობენ თავს მასწავლებლები დისტანციური სწავლებისას?
პედაგოგთა მნიშვნელოვანმა ნაწილმა განაცხადა, რომ პროფესიულ გადაწვას განიცდის და ფიქრობს ხომ არ მიატოვოს მასწავლებლის პროფესია:
მასწავლებლების 57%-მა თქვა, რომ კვირაში იმაზე მეტ საათს მუშაობს, ვიდრე ადრე;
მასწავლებლების 80% პროფესიულ გადაწვას განიცდის.
გამოკითხული პედაგოგების 25% კი პედაგოგიური კარიერის დასრულებას ფიქრობს. ამასთან, მათი უმეტესობა აღნიშნავს, მათ ასეთი განზრახვა COVID-19-მდე არ ჰქონიათ.
კვლევის ავტორები აღნიშნავენ, რომ შედეგები საკმაოდ შემაშფოთებელია: მასწავლებლებს უფრო მერი დატვირთვა აქვთ, მოსწავლეები ხშირად აცდენენ გაკვეთილებს და არ ასრულებენ ყველა დავალებას, პედაგოგებს და დირექტორებს კი სჭირდებათ მეტი ცოდნა და უნარები ონლაინ-სწავლებისთვის.
