ჭიათურის მუნიციპალიტეტის მერევის საჯარო სკოლის დირექტორი მერაბ ასანიძე დისტანციურ სწავლებაზე საკუთარ მოსაზრებას გვიზიარებს და აღნიშნავს, რომ გასულ სასწავლო წელს მიღებული გამოცდილება ახლა კარგად ადგებათ. მოსწავლეები მონდომებით არიან ჩართულები ონლაინ გაკვეთილებში, მასწავლებლები კი ინტერნეტრესურსების გამოყენებას სკოლაში დაბრუნების შემდეგაც აპირებენ.
„ადვილი ნამდვილად არ არის დისტანციური სწავლება, თუმცა მაინც, წინა გამოცდილებიდან გამოდინარე, უფრო მობილიზებულია ყველა, ძირითადად ვიყენებთ „თიმსის“ პროგრამას. საკაბელო ინტერნეტის გამოყენება ცოტა პრობლემურია, ამიტომ მოსწავლეები მობილურ ინტერნეტს იყენებენ. საბოლოოდ, ყველაფერი ჩემი კონტროლის ქვეშაა და წარმატებულად მიმდინარეობს სწავლების პროცესი.
რაც შეეხება ინტერნეტრესურსების გამოყენებას, რა თქმა უნდა, მივესალმები, გამოვიყენებთ აქტიურად სკოლაში სიარულის დროსაც“, - აღნიშნავს დირექტორი.
