ახალ რექტორს გია შარვაშიძეს სიტყვით გამოსვლის უფლება არ მისცეს. რექტორი და სტუმრები, მინისტრთა კაბინეტის წევრები და დედაქალაქის მერი, იძულებული გახდნენ შენობაში, კაბინეტში გადასულიყვნენ.
„არავითარი პოლიცია არ გამოგვიძახებია, აქ იყო ინფორმაცია იმასთან დაკავშირებით, რომ ძალა გამოიყენეს. ჩვენ გავარკვევთ ყოველ კონკრეტულ ფაქტს. ვინც არის დამნაშავე, დაისჯება კანონის შესაბამისად, მკაცრად დავიცავთ კანონს. მოვუწოდებ ყველას, არ არის საჭირო აჟიტირება, დიალოგი თუ გვინდა, დიალოგს გავმართავთ. მზად ვართ ნებისმიერ საკითხზე დიალოგისთვის,“ - განაცხადა თბილისის სახელმწიფო უნივერსიტეტის რექტორმა გია შარვაშიძემ.
განცხადება უნივერსიტეტში განვითარებულ მოვლენებთან დაკავშირებით გააკეთა განათლების მინისტრმაც.
„ამაზე მეტი ავტონომია და თავისუფლება, როდესაც ჩვენ ვდგავართ მთელი ხელისუფლება და ვაძლევთ საშუალებას ამ ხალხს, რომ თავისი აზრი გამოხატონ, მე მგონი არ არსებობს. ასევე მინდა ვთქვა, რომ ფორმას არ ვეთანხმები რა თქმა უნდა, მაგრამ შინაარსი არის აბსოლუტურად სწორი. სწორედ ამას ვაპირებთ, ვაპირებთ, რომ მეტი ავტონომია უნივერსიტეტს, უფრო ძლიერი თვითმმართველობა, საერთაშორისოზე ორიენტირებული უმაღლესი განათლება და ამ უნივერსიტეტმა რომ დაიბრუნოს ლიდერობა. ამისკენ იქნება მიმართული მთელი ჩვენი ძალისხმევა,“ - განაცხადა ალექსანდრე ჯეჯელავამ.
