ერთიანი ეროვნული გამოცდების ჩატარების დებულებისა და სახელმწიფო სასწავლო გრანტის განაწილების წესში ცვლილება შევიდა. განათლების, მეცნიერების, კულტურისა და სპორტის მინისტრის მიხეილ ბატიაშვილის ბრძანებით, 2020 წლის ერთიან ეროვნულ გამოცდებში აბიტურიენტებს 3 სავალდებულო საგნის ჩაბარება მოუწევთ. ამასთან, ბრძანებაში განსაზღვრულია კონკრეტული სფეროები თუ რომელ მიმართულებაზე მოუწევთ აპლიკანტებს ისტორიის და რომელზე მათემატიკის ჩაბარება.

იხილეთ ერთიანი ეროვნული გამოცდებისთვის ჩასაბარებელი საგანი/საგნები (მათემატიკა/ისტორია) დარგის/სფეროს მიხედვით.

დოკუმენტის მიხედვით, აკადემიურ პროგრამაზე ჩარიცხვისთვის აბიტურიენტი ვალდებულია ჩააბაროს შემდეგი საგნები:

• ქართული ენა და ლიტერატურა;
• უცხოური ენა - ინგლისური, გერმანული, ფრანგული, რუსული - ამ უცხოური ენებიდან ერთ-ერთი უმაღლესი საგანმანათლებლო დაწესებულების აკადემიური პროგრამის შესაბამისად
• მათემატიკა ან ისტორია - უმაღლესი საგანმანათლებლო დაწესებულების საგანმანათლებლო პროგრამების მიხედვით.

უმაღლესი საგანმანათლებლო დაწესებულება ვალდებულია, სავალდებულო საგნად განსაზღვროს მათემატიკა ან/და ისტორია. თუ უმაღლესი საგანმანათლებლო დაწესებულება სავალდებულო საგნად განსაზღვრავს, როგორც მათემატიკას, ისე ისტორიას, აბიტურიენტი უფლებამოსილია აღნიშნული საგნებიდან ჩააბაროს ერთ-ერთი ან ორივე საგანი.

აკადემიურ პროგრამაზე ჩარიცხვისთვის, გარდა სახელოვნებო-შემოქმედებითი ან სასპორტო, საგანმანათლებლო პროგრამებისა, უმაღლესმა საგანმანათლებლო დაწესებულებამ შესაძლებელია დააწესოს დამატებითი გამოცდა ჩამოთვლილთაგან ერთ ან რამდენიმე საგანში:

• ფიზიკა;
• ქიმია;
• ბიოლოგია;
• ზოგადი უნარები;
• გეოგრაფია;
• ლიტერატურა;
• სახვითი და გამოყენებითი ხელოვნება;
• სამოქალაქო განათლება.

უმაღლესი საგანმანათლებლო დაწესებულების მიერ გათვალისწინებულ ორ ან მეტ საგანში დამატებითი გამოცდის დაწესების შემთხვევაში, აბიტურიენტი უფლებამოსილია აირჩიოს ერთი ან რამდენიმე საგანი.

დიპლომირებული მედიკოსის/სტომატოლოგის, საექთნო საქმის, სამეანო საქმის, ფიზიკური მედიცინისა და რეაბილიტაციის, ოკუპაციური თერაპიის, ფარმაციის, საზოგადოებრივი ჯანდაცვის საგანმანათლებლო პროგრამებზე ჩარიცხვისთვის აბიტურიენტი ვალდებულია ჩააბაროს შემდეგი საგნები:

• ქართული ენა და ლიტერატურა, უცხოური ენა, ბიოლოგია;
• ფიზიკა, ქიმია ან მათემატიკა.

ერთიან ეროვნულ გამოცდებზე მინიმალური კომპეტენციის ზღვარი უცხოური ენის და მათემატიკის გამოცდაში შეადგენს ამ საგნისთვის განსაზღვრული მაქსიმალური ქულის 20%-ს, ზოგადი უნარების გამოცდაში 30%-ს, ხოლო ყველა სხვა საგანში – თითოეული საგნისთვის განსაზღვრული მაქსიმალური ქულის 25%-ს.