ამბროლაურის მუნიციპალიტეტის ველევის საჯარო სკოლა საბიბლიოთეკო კვირეულში წარმატებით ჩაერთო.
„რაჭა - ჩვენთვის სამშობლო აქედან იწყება“ - ისტორიულ- ლიტერატურული კომპოზიციითა და სკოლაში არსებული, ბავშვების მიერ შეგროვებული ეთნოგრაფიული ექსპონატებით მოსწავლეები ამბროლაურის ცენტრალურ ბიბლიოთეკაში საინტერესო აქტივობით წარდგნენ.
ღონისძიებაში სკოლის შვიდივე მოსწავლე მონაწილეობდა: ანი და ლუკა არდიები, სალომე ვაჩაძე, ლაშა ტოროტაძე, ლიზი,ელენე და ლუკა გოგსაძეები.
ლუკა არდიამ რაჭის მნიშვნელოვანი ისტორიული ძეგლებისა და ველევის თემის ღირსშესანიშნაობების სლაიდშოუ მოამზადა.
რაჭის ისტორიისა და რაჭაზე შექმნილი ლექსების, აგრეთვე გამოჩენილ საზოგადო მოღვაწეთა გამონათქვამების კითხვა ნინო ბაშარულისა და ანსამბლ „ბასიანის“ მიერ შესრულებული სიმღერების ფონზე მიმდინარეობდა.
ღონისძიებამ, რომელიც ქართული ენისა და ლიტერატურის სერტიფიცირებულმა პედაგოგმა, ეკატერინე (კატუშა) ჭიჭინაძე- გოგსაძემ მოამზადა, დამსწრეთა მოწონება დაიმსახურა, მოსწავლეებს კი ფართო საზოგადოების წინაშე წარდგომის, მხატვრული კითხვისა და ზეპირმეტყველების უნარები განუმტკიცა.
ღონისძიების დასასრულს, ბიბლიოთეკის თანამშრომლებისაგან მოსწავლეებს სამახსოვრო საჩუქრები გადაეცათ.
