„მოკლე ციკლის პროგრამების“ საბაკალავრო და სამაგისტრო საფეხურების შემცირებასთან დაკავშირებით გადაწყვეტილება უკვე მიღებულია და კანონის საფუძველზეც განსაზღვრულია, თუმცა, წელს ამ მხრივ ცვლილებები არ განხორციელდება. ამის შესახებ განათლების, მეცნიერების, კულტურისა და სპორტის მინისტრის მოადგილემ, ირინა აბულაძემ ჟურნალისტებს განუცხადა.
მისივე თქმით, ამ ეტაპზე არ არის ცნობილი კონკრეტული ფაკულტეტები, რომელსაც აღნიშნული ცვლილებები შეეხება.
„კანონის საფუძველზე ეს უკვე დადგენილია, თუმცა „მოკლე ციკლის პროგრამების“ განხორციელება, მათ შორის პროფესიულის საფუძველზე. ამ მიმართულებით უცხოელ ექსპერტებთან და ხარისხის განვითარების ცენტრთან მუშაობა მიმდინარეობს. მოგეხსენებათ, განათლების ხარისხის მიმართულება გადის საერთაშორისო შეფასებას, ველოდებით დასკვნას და შესაბამისად, ამის შემდეგ დაიგეგმება უკვე პროცესები ჩვენს საგანმანათლებლო პროგრამებში შესატანი ცვლილებების შესახებ. წელს ეს არ ამოქმედდება და ამ ეტაპზე არც კონკრეტული ფაკულტეტები არ ვიცით, რომელსაც ეს შეეხება“, – განაცხადა ირინა აბულაძემ.
