სასკოლო ცხოვრებაში მშობლების აქტივობა იზრდება - მშობლებს საშუალება ექნებათ, სასკოლო სახელმძღვანელოს რეცენზირების პროცესში მონაწილეობა მიიღონ. კერძოდ კი სახელმძღვანელოების შესახებ რეკომენდაციები და შენიშვნები წარმოადგინონ.
ცვლილება „ზოგადსაგანმანათლებლო დაწესებულების სახელმძღვანელოს/სერიის გრიფირების წესის დამტკიცების შესახებ“ კანონში შევიდა. კანონს დაემატა ქვეპუნქტი, რომელიც მშობელთა ჩართულობას ითვალისწინებს.
„საზოგადოებრივი საწყისებიდან გამომდინარე, რეცენზირების პროცესში ხორციელდება მშობლების ჩართულობა, რაც გულისხმობს სახელმძღვანელოს/სერიის მაკეტის (ანონიმური ეგზემპლარი) გაცნობასა და მათზე არგუმენტირებული შენიშვნა/რეკომენდაციების წარმოდგენას.
რეცენზირების პროცესში მშობელთა შერჩევის, მათი ჩართულობის წესი და პირობები განისაზღვრება სახელმძღვანელოს/სერიის მაკეტის რეცენზირების წესით.
მშობელთა მიერ გამოთქმული შენიშვნა/რეკომენდაციების გაზიარების შესახებ გადაწყვეტილება მიიღება შესაბამისი საგნობრივი ჯგუფის წევრთა ხმათა უმრავლესობით, თუკი მაკეტზე გამოთქმული შენიშვნა/რეკომენდაცია მიმართულია მაკეტის გაუმჯობესებისკენ, საკმარისად დასაბუთებულია და მისი გათვალისწინება განპირობებულია აუცილებლობით“,-ნათქვამია ბრძანებაში.
