მასწავლებელთა კომპეტენციის დადასტურების გამოცდის სააპელაციო განაცხადების მიღება უკვე დასრულდა. შეფასებისა და გამოცდების ეროვნული ცენტრის დირექტორის მოადგილის ივა მინდაძის განცხადებით, წელს ცენტრში 1200-ზე მეტი სააპელაციო განაცხადი შევიდა. მისივე თქმით, ყველაზე მეტი განაცხადი ეხება პროფესიული უნარების გამოცდას:

„1200-ზე ოდნავ მეტი საჩივარი შემოვიდა. ყველაზე მეტი სააპელაციო განაცხადი პროფესიულ უნარებშია, დაახლოებით - 500-მდეა. შემდეგ კი - დაწყებითი საფეხურის ტესტებზე, დაახლოებით - 100-მდე განაცხადია. დანარჩენ საგნებში კი ათეულობითაა საჩივრების რაოდენობა, რიგ შემთხვევაში კი - ერთეულია,“ - აღნიშნა ივა მინდაძემ Etaloni.ge-სთან საუბრისას.

მისივე თქმით, სააპელაციო განაცხადების განხილვა 3-4 დღე გაგრძელდება და დაახლოებით იმ კვირაში გახდება ცნობილი, თუ რამდენ მასწავლებელსა თუ მასწავლებლობის მსურველს  შეეცვლება აპელაციის შედეგად ქულა. ქულის ცვლილების შემთხვევაში აპლიკანტს გადახდილი თანხა უკან უბრუნდება.