კავკასიის საერთაშორისო უნივერსიტეტსა და ივანე ჯავახიშვილის სახელობის თბილისის სახელმწიფო უნივერსიტეტს შორის განათლებისა და სამეცნიერო - ტექნიკურ სფეროში ურთიერთთანამშრომლობის მემორანდუმი გაფორმდა.

მემორანდუმს ხელი, ერთი მხრივ,  კსუ-ს რექტორმა - კახაბერ კორძაიამ და მეორე მხრივ, თსუ-ს რექტორმა - გიორგი შარვაშიძემ მოაწერეს.

აღნიშნული შეთანხმების დოკუმენტი, თანამშრომლობას რამდენიმე ძირითადი მიმართულებით გულისხმობს, კერძოდ:

• ერთობლივი სამეცნიერო-პრაქტიკული კონფერენციების, ტრენინგებისა და მასტერკლასების ჩატარება;

• საგანმანათლებლო პროგრამების, ფუნდამენტური და გამოყენებითი სამეცნიერო კვლევების, მაღალი ტექნოლოგიებისა და თანამედროვე ექსპერიმენტების განხორციელება, ინოვაციური კვლევებითა და სწავლებით საუნივერსიტეტო ტრადიციების განვითარება;

• საუნივერსიტეტო განათლებისა და კვლევითი პოტენციალის განვითარება;

• ინტეგრაცია ევროპულ საგანმანათლებლო და სამეცნიერო სივრცეში;

• საქართველოსა და უცხოეთის უმაღლეს საგანმანათლებლო დაწესებულებებთან და სამეცნიერო კვლევით ცენტრებთან ერთობლივი საგანმანათლებლო პროგრამებისა და სამეცნიერო-კვლევითი პროექტების განხორციელება;

ურთიერთთანამშრომლობის მემორანდუმის გაფორმების ცერემონიას, ორივე უმაღლესი საგანმანათლებლო დაწესებულების სხვადასხვა დეპარტამენტის წარმომადგენლები  ესწრებოდნენ.